空姐可以周圍飛，接觸唔同地方機會比較多，緣份天空下，嘉瑩就喺意大利時，遇到波蘭好好先生、會計部主管Peter，結婚9年，婚後定居波蘭格丁尼亞（Gydnia），生咗兩名混血囝囝。嘉瑩係陳貝兒主持大台真人騷《嫁到這世界邊端2》最後出場嘅波蘭人妻。
嘉瑩過往幾段感情都遇人不淑，佢再拍拖都要小心擇偶，佢大呻：「以前喺香港拍拖遇到好多差嘅男仔，試過有一個好花心，每晚都將電話入面所有通話記錄刪除，我問佢，佢就話有潔癖，鍾意乾淨。」當年27歲嘅嘉瑩，有次孖閨密享受一個羅馬假期，佢哋又冇訂好酒店，偏偏行李篋撞爆轆拖唔郁，唯有揀間就近青年旅舍入住，但全部單人房爆滿喎，唯有入住一間10人房，同世界各地嘅背包客共處一室，而單身Peter獨自外遊又係佢哋室友，見到嚟香港靚女就留下好印象，有一晚全部部室友約咗出去夜蒲開P，嘉瑩話唔舒服，要瞓陣晏啲先join，Peter就守候，點知嘉瑩瞓過籠甩咗底，佢哋就係咁點着愛火。
事後雖各自回國，但一直保持聯絡，Peter喺3個月後由波蘭來港探嘉瑩，仲帶埋求婚戒指，嘉瑩都猶豫咪為咗相識3個月嘅人賭一鋪。其實波蘭民風純樸，國民大部份係天主教徒，離婚率甚低，嘉瑩深信Peter唔係玩玩吓。
嘉瑩交往時仲有一個隱憂，佢話：「我由細到大，有嚴重脊柱側彎，做過一次大手術，醫生話冇百分百保證以後一定冇事，將來有機會行唔到，以前曾有一個香港男友，知道我有呢個問題，本來約約吓都冇再搵。」不過，嘉瑩選擇同Peter坦白交代病情，男方不但唔介意，仲話會照顧佢一生一世，「老公就同我講，又唔係去街市買嚿豬肉，秤下邊件好啲，愛你就要衝破萬難，點都要娶你。我覺得自己遇到一個咁好嘅男仔，機會率真係好細，波蘭雖然比較落後、比較窮，我都願意嫁過去，我只想同老公一齊。佢真係好純好純，呢個世界好少有呢種男仔。」
嘉瑩媽咪知道就鼓勵女兒去追求真愛，嘉瑩於是答應嫁去波蘭，佢返航空公司遞信辭職，其他空姐同事都唔睇好，認為波蘭係窮國家，而且佢哋相識日子太短好冒險。決定成行，卻又一波三折，當地政府要所有外國人出示一張由自己國家發出，證明係身家清白同可以合法結婚嘅證書，但香港特區政府根本冇呢類證書，佢哋唯有向駐波蘭中國國領事館求救，Peter心急娶伊人，差啲要跪求。佢哋婚後住喺格丁尼亞，結婚時僅用港幣60萬，就買到當地一個面積600呎愛巢。
精選娛聞，喺晒《娛果》
http://fb.com/appledailyent
| 嘉瑩（左二）原職空姐，為愛嫁去波蘭。 | | |
| | |
|
鍾意就快D Share啦！
|
|
|