試問有邊個估到，喺娛圈行古惑都可以行一世？講緊嘅之唔係「浩南」鄭伊健囉！好耐冇嚟賀台慶嘅佢，突然蒲頭唱《友情歲月》：「消失的光陰散在風裏，彷彿想不起再面對，流浪日子，你在伴隨，有緣再聚……」暫且唔評論佢嘅唱功十、九幾年嚟有冇進步過，但係嗰種逐粒字、逐粒字「扽」出嚟嘅唱腔，好那些年嘅感覺，會令人不期然跟住大聲唱，唱完仲要喺網上洗版！同啲三唔識七嘅網友狂吹，直頭覺得佢親過同一個阿媽生嘅大佬！
講到做大佬，「浩南」返到屋企頂多都係做阿二，皆因佢真正嘅「阿大」，係老婆蒙嘉慧（YoYo）。YoYo當年收呢條𡃁，使乜出刀亮槍、血洗銅鑼灣咁暴力㗎，擸番支羽毛球拍就夠啦，就係憑呢支曱甴都未必打得死嘅球拍，得閒唔係飲茶而係開波，約昂藏六呎、有黃金胸肌嘅伊健去打友誼賽，呢啲球來球往嘅親密互動，拍吓拍吓，就畀YoYo泊到個好碼頭，從此使乜捱更抵夜背劇本咁頭痕！
做Kidult唔願做老竇
當紮做鄭家「坐管」啦，即係管食、管瞓、管玩嗰種，都只係40歲人咋，好似頤養天命咁，Day Day食飽冇嘢做，如果唔係伊健頂唔順，眼見本來高瘦平嘅靚老婆，頹到變肥膩腫嘅偽大媽，先至勸老婆搵啲細藝，客串吓電台嗰啲拍幾日就收工嘅單元劇，否則YoYo仲係處於不動Mode。
講真吖，YoYo有咁爽皮嘅生活，都要多得伊健寧願做Kidult，都唔願做老竇咋！幾十歲人，就好似廢青咁，沉迷打機當返工打字，冇富爸，有旺夫嘅YoYo，一樣可以玩世不恭，唔使生仔福照享，真係恨死伊健位前度。你知啦，YoYo個樣好有愛咁，但當年拍無綫劇《爸爸閉翳》時，就傳佢同劇中小演員唔啱Key，雖則有位正義媽媽幫口澄清，話佢只係同啲小朋友冇偈傾，咁佢鍾意部遊戲機多過啲細路仔，又唔怪得佢㗎喎，做戲之嘛，使乜吓吓出真感情，一定要打真軍㗎咩？就算要打，都係同老公打啦，係話佢真心鍾意同伊健打機咋，咁佢老公出名係打機達人，如果YoYo唔練打機秘技，容乜易老公搵第二個女人對打？而伊健係生得高大啫，但有時都成個大細路咁，如果YoYo突然轉死性發仔姣，咪捉個老公嚟玩囉，咪一樣過到湊仔癮。
皺皮之前求代表作
話時話，YoYo識揀呢碟「伊麵」就知佢係識食之人，原來仲係食腦之人，未鍾意打機氹老公之前，經常流連雀會，就係大殺四方殺得多，朝打晚打，烏蠅都變精英，煉成腦精口伶，唔生仔固然醒，更加強！講到尾，YoYo有錢又有型仔老公，人生冇乜遺憾，獨缺一齣代表作。嗱，咪話Nuts哥講嘢Mean呀，連網上都搵唔到佢有咩大作品！ YoYo大大話話喺無綫做女主角十幾年，拍過25齣電影，仲曾經係杜琪峯御用女一之列，只不過佢最大代表作就係嫁咗畀伊健咁大把！所以話呢，YoYo應該趁個樣仲認得，快快趣出番嚟整靚份CV， 喺有生之年、皺皮之前拍番齣好戲，唔通旨意啲忠粉上網篡改歷史咩？
|
鍾意就快D Share啦！
|
|
|