余小姐上星期四（13號）凌晨兩點放工，喺旺角搭小巴返元朗屋企，點知遇着個司機沿途揸車不停舂眼瞓，仲有兩次差啲撞車，有乘客發現即止喝醒佢，但都阻止唔到佢繼續釣魚，最終成車乘客嚇到中途落晒車。
余小姐話深宵小巴有名你叫亡命小巴，但佢搭嗰架小巴啱啱相反，車速維持30幾40公里，又慢又chok。余小姐自己都有瞓覺，小巴差唔多去到屯門嗰陣，突然間有個男乘客好大聲嗌司機起身，唔好再瞓覺，不停同佢講嘢等佢精神啲，原來司機舂眼瞓差啲撞車，余小姐同其他乘客先醒覺司機有啲唔妥。
先發制人嘅男乘客落車之後，小巴繼續向洪水橋行駛，車上仲有大約10個乘客，大家都唔敢再瞓，𥄫實司機。點知司機更加慢速，去到燈位好似溜前咁幾乎撞埋交通燈度，全車人即刻喝停司機，佢先如夢初醒急急煞車，10個乘客嚇到即時落晒車。
之後余小姐同朋友講返呢件事，朋友即刻send啲連結畀佢睇，原來呢個光頭司機揸車舂眼瞓已經出晒名，之前有唔少乘客影相拍片放上網，甚至向站頭反映咁危險嘅情況，但係都冇用。余小姐慨嘆投訴無門！
你敢爆，我敢獎！ 立即WhatsApp《蘋果》24小時爆相爆片熱線或致電：63836568
|
鍾意就快D Share啦！
|
|
|