觀眾話大帥哥身邊三條o靚（洪永城、徐榮和李嘉）演技麻麻地，未夠班同張衛健稱兄道弟。不過，佢身邊三條女（譚凱琪、楊秀惠、蔡思貝）就表現出色，唔單只樣靚身材好，角色性格亦拿捏得到，最重要係同大帥哥有火花，一樣咁搞笑，特別係楊秀惠。
《大帥哥》艾妞一角，可以話係為楊秀惠度身訂造。唔係指姣屍扽㞘成個邪花蕩婦呢方面，而係指一啲橋段、對白，擺明就住楊秀惠去諗去度，例如用腳幫張衛健搓腳呢幕、「我嘅豐胸玉腿係屬於大帥哥」呢句對白等等，係得楊秀惠嘅外在條件先夠說服力。仲有個例子好搞笑，楊秀惠對白話：「大帥哥嘅全部都係屬於我。」點知張衛健接咗句：「我嘅臀部都屬於你？」大家都知楊秀惠廣東話唔正，咁樣俾張衛健爆肚法，觀眾真係邊睇邊笑到夾夾聲有腹肌。
坦白講，艾妞一角成日「耶、耶、耶」，聽到人打晒冷顫好骨痺，但又覺得好自然唔造作，所以楊秀惠飾演呢種嗲聲嗲氣邪花角色，真係好入型入格。其實佢都知自己好啱呢種角色，所以都驚觀眾誤會佢本人就係呢種「狐狸精」、「蜘蛛精」性格，特登拍咗條片幫自己澄清，都幾有趣架：「剛才那個蜘蛛精艾妞大家有沒有看？大家會否誤會那是真正的我？我想告訴大家，那是演技，楊秀惠真人不是這樣的。明天開始，如果你身邊有朋友說楊秀惠就是艾妞那樣，你就要告訴他們：『不是，那只是演技。』我明天怎樣踏出家門呀？」
楊秀惠2004年加入無綫至今，曾4度提名「最佳女配角」，但從未成功得獎。今次艾妞咁受觀眾喜愛，未知能否為佢奪得入行14年嚟首個獎項呢？
來源 source: http://nextplus.nextmedia.com
|
鍾意就快D Share啦！
|
|
|
