東網巨星新節目《我和星星有個約會》首集就請來軒仔教幸運女歌迷Rachel唱情歌溝仔！Rachel偕兩位朋友「壯膽」齊齊來到偶像的錄音室，請教翻唱陳曉東的《心有獨鍾》：「想向一個我鍾意咗好耐嘅男仔表白，月底佢生日會有個朋友聚會，到時有個Live band，我就可以同佢唱呢首歌！」軒仔聞言笑說：「嘩，好冧喎！依家啲女仔真係好主動！」
伴奏暗戀心聲
軒仔先陪Rachel練開聲，並直接問：「你自己覺得點呀？溝唔溝到呀？」Rachel坦言：「好似唔唱好啲，嚇親佢！」軒仔先找出她的Key，再以鋼琴伴奏，更傳授「軒式」唱歌技巧：「其實唔一定下下要求唱到好似職業歌手咁，反而會嚇親佢，呢啲叫Organic，誠意搭夠，但自己要返去練，今日時間有限。」
經軒仔指導後歌藝有明顯進步，Rachel隨即請教軒仔：「有冇咩秘訣畀我追到呢個男仔？」軒仔立即傾囊相授：「男仔對女仔冇咁多要求，女仔唱歌畀男仔聽，好少會覺得冧，因為男仔好怕畀反應，特別係我呢啲咁內斂型嘅人。」更提供貼士：「一定要畀埋練歌呢段片佢睇，咁就實得！」軒仔坦言Rachel唱歌冧仔成數不高，但仍祝福她得米：「祝你好運，快啲搵到你嘅白馬王子！」並送上「愛的抱抱」為她加油，同時滿足埋Rachel同是軒仔歌迷的朋友，逐個簽名及送上「集郵」機會！
唔愛花臣𢱑折現
Rachel坦言有機會跟偶像唱歌是「發夢都估唔到」，並自爆其表白對象其實近在眼前：「頭先話鍾意咗好耐嘅男仔就係軒仔，希望佢可以接受我呢份愛意。我由小學開始已經鍾意佢，佢嘅優點真係多到不能盡錄，希望佢會收到」軒仔表示昨日他看過Rachel的「示愛」片後，驚訝到O晒嘴：「原來嗰個人係我，唉！好啦。」並大讚Rachel相當有心，又笑說：「但真係唔使搞咁多嘢，下次折現得」
媽媽級Fans 重燃Sing夢
育有5歲囡囡的Rita自小喜歡唱歌，求學時已學填詞和作曲，但性格內向只在家中自娛，而做人母後更是全心全力照顧小孩，苦無一個唱Live的機會。
張敬軒出名愛錫粉絲，希望能與她見面及合照，重燃她對音樂的衝勁。軒仔即場加插「彩蛋」與她合唱，喚起其興致，深受感動的Rita感激軒仔悉心安排：「好意外，好感動，冇諗過軒仔真係願意成全我，希望將來可以同囡囡一齊合唱佢嘅歌！」
|
鍾意就快D Share啦！
|
|
|