原來香港歌手想賺人仔，唔一定上節目登台唱歌㗎。Eric孫耀威就醒啦，發掘到條新財路，做直播網紅，據聞彈琴唱歌兩粒鐘就大賺7位數港幣，吸金力相當強勁！佢自己都話意想不到：「原來網紅嘅收入係好勁，我今次做咗先知道。」
相信其他歌手之後都會開始仿傚，但都唔係話想做就做到，Eric話香港藝人暫時好難喺內地直播平台做到實名認證，佢自己都用咗大半年時間同干台方面溝通，爭取同內地藝人一樣做直播，最後先成功成為第一個香港實名認證藝人。實名認證有咩用？簡單嚟講，認證咗先可以拎到版稅。
問到Eric點解會識得加盟直播平台開LIVE，佢話靈感嚟自抖音：「舊年喺內地拍戲時，我覺得好奇怪，點解個個人都玩抖音，無論身邊女主角、導演、老臨都好，全部都玩抖音。」佢更發現，抖音上面有唔少人瘋狂轉載自己嘅商演視頻，點擊率仲好誇張：「試過一啲我商演嘅Video可以有過億點擊，變咗好多人喺網上面重新將我啲舊歌、舊戲翻炒出嚟當成新嘅。例如《愛的故事上集》係首舊歌，但內地網民當成新流行曲咁去學唱，連帶我以前一啲內地電視劇都攞返出嚟睇，所以一時間變咗喺網上充斥咗好多我嘅作品。嗰幾個星期好勁，突然間我喺抖音入面由零開始，最後有四百幾萬fans，因為咁樣就變咗好多網上平台邀請我去佢哋度做直播。」據知Eric嘅直播，最高峰有350萬人去睇，係一個電視台都未必做到嘅數字。
Eric好快成為直播界紅人，連帶有更多平台邀請佢，例如喺新平台做一個新歌發表會，咁就破咗人哋全年點撃率，認真厲害。然後商演邀請亦都接踵而來。「我個北京經理人公司熱線俾佢哋炸咗好幾個月，好多好多人搵上門，包括正常品牌商演或者地產嗰啲，搞笑嘅係一啲人嘅婚禮會叫我去做證婚人，有好多好搞笑㗎。」
記得Eric喺上年年尾舉行演唱會時，講過希望喺入樂壇25周年呢個重要時刻，能夠去各大小城市做show，哪怕係商演又好歌友會都好，都想面對面見一見fans：「可能佢哋支持咗我好耐都無見過我真人一面，無聽過我唱LIVE，好想透過25周年呢件事去回饋返俾佢哋，多謝佢哋。」Eric做到喇！憑住抖音、直播平台等網絡威力，佢變成當紅炸子雞，帶挈好幾十個商演，能夠去唔同地方見fans。
來源 source: http://nextplus.nextmedia.com
|
鍾意就快D Share啦！
|
|
|