馬上成為壹會員
會員專區 只限會員閱讀
英雄莫問出處。
52歲嘅姜皓文，童年在兒童院長大。14歲開始打工養自己，到酒樓賣點心，做過裝修工人，當藝人之前，他在雜技團賣藝為生。
姜皓文:「我跟張存師傅，即係好多年前無綫嗰啲踩雞蛋、吳剛食炭，全部都係我哋教，我哋一齊去教藝員做呢啲表演。另外我哋會去宋城表演，例如飛筷子、心口碎大石，宋城、海洋公園都會去，當時我只係十五、六歲左右。當年海洋公園有支飛鷹跳水隊，唔知你記唔記得？我就係下面嗰班小丑之一，打斛斗跳落水嘅小朋友。」
娛樂圈，他由臨時演員做起。86年參加亞視先生選舉得亞軍，然後正式成為電視台藝員。經歷過浮浮沉沉，33年後事業走入佳境，當上電影男主角，大台劇《鐵探》中的「Bingo」贏民心。當日輸在起跑線的苦澀經歷，成就好戲在後頭的人生。
- 吳炭當年經典作「食炭」，係姜皓文做雜技團時有份教佢。
- 肥姐及周潤發分別喺大台大型節目表演過踩雞蛋，當年姜皓文已跟雜技團四出表演呢一招。
坎坷童年成演技爆發
姜皓文出世前，生父就拋妻棄子走了。母親之後改嫁，再誕下子女，其後母親患重病，在姜皓文14歲那年去世。兒童院是他兒時成長的地方。
「由細到大我都幾獨立，因為好細個已經入住兒童院，小時候屋企已經複雜到不得了，幾兄弟姊妹又分開咗，最後得番我帶住妹妹。之後連妹妹同我都去埋兒童院，久而久之習慣咗喺兒童院嘅生活。嗰時喺兒童院住到唔想返屋企，因為太開心，而且返到屋企又覺得面積好細，得四面牆，好似好壓迫咁樣。」有時候小孩比大人更懂得適應環境，尋找生存之道。
成長不快，曾經是包袱，直至有天用在演技上，反而成為宣洩內心的渠道。
「我經常話自己啲戲唔係特別好，只係因為我啲經歷比較多，好多時飾演角色時都係抽番呢啲經歷出嚟，又好似啱用喎！所以拍戲時會勾起好多回憶、往事，配合番所演嘅角色。近幾年演嘅角色都係好低沉，內心好多嘢諗，所以都好配合。」姜皓文說。
《鐵探》一幕「Bingo見探監母親」的洋蔥內心戲，發自他現實中這段情節：「我從小係由婆婆照顧，直至小學，之後佢身體開始變差，有段時間同婆婆分開咗，甚至失聯。就喺我住兒童院嗰段時間，好奇怪，我居然喺電視機上見到婆婆，有個港台節目介紹老人院，我見到之後搵番佢。就係我搵番佢嗰段時間，佢開始有腦退化症。」
再見生父 姜皓文冇感情
至於「素未謀面」的生父，想過尋親重逢嗎？
「唔需要。好細個嘅時候，聽過爸爸係開麻雀館嘅，但係之後大人傾偈嘅內容，我已經完全唔記得。
雖然我唔太抗拒將來見番爸爸，但又無衝動想去搵番佢，可能由細到大都已經習慣無爸爸嘅感覺。就算真係見番佢都唔知有咩好講，大家始終無一齊生活過，朋友又唔係，大家無感情。就算見到佢都只係得個知字就算，或者：『哦，你係我爸爸。』我會咁樣囉！」
跟繼父感情，他說:「佢幾乎等於養大我，感情好好，我都跟咗佢好多年，但而家已經離開咗喇。我跟同母異父嘅妹妹一樣好好感情，佢變咗我媽一樣，好關心我。」
- 姜皓文出世前(左一)，生父已拋棄家庭離家，母親(中)改嫁後患重病去逝，外婆(右一)曾經照顧他，但姜皓文其後入住兒童院與外婆失聯，重逢時外婆已患腦退化，不太認得他。
- 《鐵探》一幕洋蔥戲，勾起他的童年往事。
安德尊歐錦棠曾叫他跳槽
自小只求糊口生存，安安穩穩，不想冒險搵機會更上一層。
「以前就算幾辛苦都只係隨遇而安，我又無咩大想頭，無咩大諗法，以前都係餐搵餐食餐餐清，無諗過將來會點樣。直至認識老婆之後，先開始有諗將來。就算喺亞視時，好多同事跳槽無綫，或者跳到更高層次嘅工作，我都唔會好恨跟住去做，我覺得喺亞視已經好好，一個月搵幾個月人工，因為爆騷得好緊要，當時好多節目都會搵我。
當時安德尊跳槽後有搵我，歐錦棠又有搵我，但只係佢哋搵我啫！無綫係從來無搵過我嘛，所以我亦唔會主動去敲門。」
今日他是最後一個亞視要員，轉拍大台劇，結果如角色名字。
「Bingo嘛，中㗎喇！最近十年我覺得好攰，但同時我開心嘅，搵番好多嘢，追番以前錯失嘅機會、走漏眼嘅嘢，工作上而家的確好順利。」
返兒童院鼓勵人
近年他常返兒童院，以過來人身份，跟面對家庭問題的小孩及青少年，分享環境如何差勁，路還是要堅持行得正確。
「而家都會去番以前住過嘅宿舍團體，同佢哋傾偈，分享下。畀佢哋知道，我以前都係喺宿舍長大，我好榮幸可以話俾佢哋聽，由呢間宿舍行出去，而家我可以變成咁樣（有成就），希望俾佢哋好似打支強心針一樣，我好明白喺宿舍長大，冇咁有自信，亦好似俾人排斥或者睇唔起，佢哋可能會有咁嘅感覺，因為以前我會有咁嘅感覺，所以當年每有大哥哥返嚟分享打氣，整個人嘅信心都會增強好多。」
採訪:Sukey Lo
攝錄:黃志明
場地:台北‧寬巷子
服裝:速寫@JNBY
髮型:Jove Shek@La Mod Salon
化妝:Herrylaiming Make-up
- 首次拍大台劇《鐵探》，憑「Bingo」一角入晒屋。
立即下載APP，精彩內容壹手掌握
下載連結： http://bit.ly/Next29App如對會員訂閱制有預到任何問題或意見，你可以致電 2623 9985，或電郵聯絡客戶服務主任cs@nextdigital.com.hk，我們定當盡力協助！
來源 source: http://nextplus.nextmedia.com
|
鍾意就快D Share啦！
|
|
|