66歲的盈盈，是TVB第一屆藝員訓練班的學員，是香港富豪趙世曾上個世紀80年代的女友，為他生下兒子趙式浩，在戀上趙世曾之前，她曾與影星陳觀泰相戀，並育有一女陳詠希，與趙世曾分手後，再結識了黃姓商人，移民到美國，再誕下一子黃偉文，她的情史遠比她的事業豐富得多。
當年18歲的盈盈在母親的鼓勵下，考入TVB成為第一屆藝員訓練班的畢業生，同屆同學有甘國亮、蘇杏璇、陳嘉儀、呂有慧，導演林德祿等，畢業至今已有47年。她笑言小時候被家人讚「出名係靚」，就在媽媽鼓勵下去考訓練班，入到訓練班成為班花，連化妝大師陳文輝都叫她「阿靚」，做藝人是她的第一份工作，當時月薪大概得30元，只夠錢買飯盒。畢業後，她拍過劇，她表示：「拍戲日子都唔夠一年，拍過好少，都係做過第二、三主角，成班人柴娃娃，我做嘅角色係刁蠻小姐，有同過陳美齡做同學演群體戲，做千金小姐，成日蝦蝦霸霸，都係好好玩。」
盈盈以光速揀定愛情，放棄事業去拍拖：「嗰時18歲，純情，好鍾意朋友，為愛情都冇乜點樣出嚟拍戲。」記者問到會否多公子哥兒追求，她笑言：「唔記得咗喇，嗰時太多朋友，我好活躍，又鍾意朋友，又易開心，又鍾意熱鬧。」三段為人所知的感情，頭兩段分手各行各路，到現任的黃姓商人結婚，有指二人已離婚，故被傳媒以「坎坷」形容她的情路，在她眼中看自己是理智的，每段感情都是她提出分手講bye bye：「我個人係感性，拎得起放得低，我自己夠膽去承擔、承認，自己重新再嚟過，失敗乃成功之母，自己個樣又唔係好醜樣，又唔係好差，點解唔畀自己信心、信念，所以香港人嚟講，好多朋友為愛情睇唔開，自殺又盛，變咗生命好寶貴，唔好自己睇唔開，人要正面睇。」
談到舊愛，再見亦是朋友，她表示：「每一段都仲有朋友做，好似陳觀泰，大家都係朋友，不過好少見面。分開咗佢都知道我好好，我以前比較火爆啲，唔鍾意就算數，恃住自己靚，而家唔係，比較有包容，以前比較刁蠻，而家信咗主耶穌，點樣去做得好，點樣寬恕、寬容人。」與趙世曾的一段情，因對方花心而分開，現在亦是友好的關係，她表示：「大人嘅錯，小朋友係無辜，唔好影響細路仔，大家好嚟好去，佢4歲我就交畀佢爹哋，我就嫁咗去美國，到佢讀書，到佢8、9歲，每年都搵空姐帶佢嚟探我，暑期我每年都返嚟睇佢，到讀中學都跟我住咗幾年，趙生都好好，而家大家都係好朋友，呢兩年少啲見佢，因為我自己又忙，做吓生意、做義工，做髮型屋，自己做代言人。」
與陳觀泰、趙世曾冇結婚，與黃姓商人結婚多年，她就澄清二人絕無離婚一事：「其實以我哋嘅年紀，咁多年，點會結婚又離婚？冇可能，我先生喺6歲去咗美國，適應咗美國生活，羅省地方大，人少又好悠閒。你知香港係相反，地細人又多，空氣更加唔好，每次返嚟，佢就咳唔舒服，又冇朋友，佢話年紀大去外國退休養老，你鍾意香港，咁多朋友就返嚟香港。我喺香港出世，個人又咁活躍，等你做自己開心嘅嘢，所以呢十年自己返香港發展，但每年都返美國探吓佢，周不時都WhatsApp、通電話，大家已經係老夫老妻，感情唔同咗，唔係以前好激情嗰隻，大家係友誼上好關懷、關心嘅屋企人，互相愛護嗰種。」
她的三個子女雖同母異父，但感情好好，問她如何做好母親的角色，她表示：「我個人好隨和、開通，年代唔同咗，當佢朋友，同仔女一齊猜枚劈酒，去卡拉OK，打成一片，好朋友唔當仔女，我仔女啲同學話我前衛好笑，唔會『敦』起個款。」數年前，她已榮升做嫲嫲抱孫，即二仔式浩的7歲兒子，她說：「做grandma最緊要玩，唔係湊，佢媽媽話晒事，以前驚佢冷親，而家由佢哋凍吓，凍完身體強壯啲。做老人家千祈唔好畀意見，後生唔聽你講，都要撞過板先知。」提到孫仔，盈盈即露出甜樣：「佢好乖、好cute，見到我就講『嫲嫲，I love you、我好掛住你、你好靚』，我見到佢真係好陰功，6、7點鐘先返屋企，好多嘢學，又學鋼琴、畫畫、打波騎馬啦，好似逼得佢好緊，但佢好叻，年年攞獎。」
採訪：唐如
攝影、攝錄：仇志德、林賓尼
《MCU寶石時軸全記錄》
1套6冊解構Marvel電影宇宙
入場睇Endgame前必讀天書！
https://hk.adai.ly/IFk7iee55V
-----------------------------
【記住63836568】全民爆相爆片！下一個爆料王就係你
https://bit.ly/2Guolu9
-----------------------------
星期一至五晚上10點半
《動腦Q》Let's Q the money！
http://bit.ly/2QW8LcI
| 左圖：受訪者提供 右圖攝影：仇志德 | | |
| | | |
| | | |
| | | |
|
鍾意就快D Share啦！
|
|
|