有樂壇打不死之稱的組合E-kids成員阮民安（Tommy）今年2月做咗爸爸，囝囝Caesar差不多4個月大，據知Tommy昨日帶同囝囝返太太張倚雯（Eva）娘家南寧見親戚，順道為囝囝擺百日宴兼補擺喜酒，Tommy接受東網電話訪問話：「係呀，我喺南寧，今日就返港啦。」
Tommy表示囝囝中文名叫阮治童，他說：「佢媽咪想囝囝有個日本嘅名，因為佢呢幾年喺日本做model，最後咪揀咗『治』字，『童』字嘅意思希望佢永遠有童真，有統治兒童意思，因為男仔要硬淨啲唔好畀人蝦，亦唔好蝦人。」
4、5圍變廿幾圍
Tommy指第一次見Eva嘅親戚，說：「其實今次去南寧主要諗住同親友食餐飯，本身唔係特別話要補擺喜酒，或者咩大事，因為Eva鄉下喺南寧，啲鄉親父老喺晒度，Eva呢邊親戚我都係第一次見面，點知佢啲親友知道我哋要返嚟食飯，本身諗住4、5圍同屋企人食吓啫，但個個都話要嚟，最後變咗廿幾圍，都係非常高興。」
旅遊證件最緊要
Tommy今次是BB出世後第一次出遠門，他說：「平日我哋都帶佢周圍去，等佢吸收多啲嘢，但遠門就第一次，所以BB一出世第一時間就要即刻攞passport（護照）同回鄉證。」因為要帶BB去不同地方，Tommy表示今個月Eva就有工作在日本，她要帶埋BB去，因為她是要餵全母乳，所以BB一定要跟身，他說：「所以對我哋嚟講，BB出世所有嘢未着緊要去做，最着緊係即刻搞旅遊證件，原來BB要攞咗護照先可以拎回鄉證，咁樣搞吓搞咗兩個月。」
收吉利是封
今次南寧與親友食飯，Tommy表示沒有太特別，好多親友都有畀利是囝囝，他笑說：「 其實都幾好笑，利是係心意嘅嘢我哋唔介意，但發現非常懸殊，我哋之後都有睇吓八吓啲利是錢有幾多，有一個親戚好錫Eva，佢封咗$6600元人仔利是，好開心，另一封好厚，一攞出嚟竟然係10張1元人仔嘅利是，我都未見過，仲有個離譜齋畀個利是封，入面冇嘢嘅，咁都過到骨，呢個幾好笑。」
唔怕打風冇得返香港
Tommy今晚一家三口就返港，撞正熱帶風暴「苗柏」，天文台剛公布下午5點半左右會掛8號風球，他可擔心航班受影響？Tommy笑說：「今次我哋醒目，因為大陸啲航機成日delay，我哋揀咗搭高鐵返南寧，打風估計應該唔受影響，不過我哋搭黃昏6點車，要去到先知有冇delay，希望唔好有delay，你知大陸有權delay成日咁大鑊。」
|
鍾意就快D Share啦！
|
|
|
