掃呢頁CODE去手機

2019年11月22日 星期五

C朗:【爭產風暴】C朗改遺囑 引爆婆媳戰爭 __,C朗,基斯坦奴朗拿度,

意大利八卦雜誌《Novella2000》日前爆料,C朗同女友喬治娜已經喺摩洛哥秘密結婚,C朗代表好快就作出否認,不過空穴來風未必無因,有西班牙同葡萄牙 ...






意大利八卦雜誌《Novella 2000》日前爆料,C朗同女友喬治娜已經喺摩洛哥秘密結婚,C朗代表好快就作出否認,不過空穴來風未必無因,有西班牙同葡萄牙媒體爆料,結婚告吹原因同C朗更改遺矚有好大關係,甚至引爆新一輪「婆媳戰爭」!


報道稱,34歲嘅C朗上次被爆去摩洛哥係5月時候嘅事,所以雜誌推測佢兩個可能已經結咗婚幾個月。25歲嘅喬治娜幫C朗生咗個女阿拉娜,同時仲照顧埋C朗其他3個細路,盡晒做老婆嘅本份。《Novella 2000》同時仲透露,一名接近C朗人士爆料,呢位葡萄牙巨星8月29號同律師返過去故鄉馬德拉(Madeira)更改遺囑,將喬治娜加埋入去受益人,以前C朗絕大部分財產,都係由佢阿媽Dolores把持,呢一點正正係報道所講嘅最大問題。


西班牙雜誌《Ten Minutes》以及多間葡萄牙媒體爆料,C朗媽媽Dolores同喬治娜嘅關係麻麻,尤其C朗要將自己嘅身家分畀喬治娜,就更加觸動Dolores嘅神經。報道話目前最大兩可能性,係C朗因為媽媽反對而暫時唔結婚,另一可能就係兩人係瞞住Dolores結婚,呢點亦可以解釋點解C朗並冇大排筵席舉行婚禮。事實上,Dolores一向唔係咁易飲「新抱茶」,C朗前度女友伊蓮娜,據聞就係因為搞唔掂婆媳關係而分手收場。


外界盛傳C朗嘅身家至少有3.21億美元(約25.1億港元),仲有記者當面問佢係咪有5億美元(約39.1億港元)資產咁多添,佢梗係唔答啦。但係無論係3.21億定5億都好,C朗目前喺祖雲達斯仲袋緊3,000萬歐元(約2.6億港元)年薪,廣告代言又多,單喺Instagram發帖就一年賺到3820萬英鎊(約3.9億港元),身家只會愈嚟愈可觀,喬治娜呢次真係發達喇。


立即參加「賞您睇」:https://tinyurl.com/y2e6pmwk 
Click下面粒掣,儲on.cc coins!機票、家電、超市禮券、過萬份獎品等緊你。

來源 source: http://hk.on.cc
鍾意就快D Share啦!