人稱「朱翁」的朱維德今年已達89歲高齡，曾主持《歡樂今宵》、《大江南北》、《體育世界》、《都市閒情》等節目，現仍活躍於幕前，更是《文化廣場》的老臣子，由1997年5月起做到今日最後一集，亦是他現階段唯一一個節目。朱翁今日接受傳媒訪問，仍然中氣十足，對節目完結反應出奇地冷淡，他說：「冇話捨唔捨得，做得最耐係我，當年我喺加拿大返嚟，最初係做《婦女新姿》，監製話『畀多個節目你做唔做？』我問點㗎？佢話『十衰之首』，即係全線最衰、最冇人睇嘅節目中排第一。我話好啦，我做，一年內我幫你脫個十衰，結果做咗咁耐。」
朱翁曾經問過為何要保留該節目，他說：「原來政府一定要咁做先會發牌，多年來人手調來調去，係我做到現在。」對於無綫炒一成幕後人員，他直斥其非：「我諗可能唔止喇，佢哋炒完都繼續做（同類型節目），咁無綫越來越衰，走去買片返嚟就算，可能大陸或台灣片。」可擔心缺乏香港地道文化？他說：「而家無綫唔講地道，無綫講錢。」
朱翁是香港元祖旅遊達人，向來見多識廣，計仔多多。他自認曾「口痕痕」向無綫推薦節目但被拒，他說：「其實我可以做好多節目，但無綫唔要我做之嘛，我可以做旅行，現在都可以，佢又唔睬我，我又唔理佢啫。我到而家都有搞旅行團，做過一個全牛宴，牛包豬，豬包羊，羊包雞，雞包鴿，幾近失傳，我返嚟話畀無綫聽，但佢哋唔敢做。我又認識大陸一位茶王，書房好似茶葉博物館咁，我話人哋贊助仲要錢咩？佢哋話『出鏡要錢』，我聽到都暈，真係嘥心機，大佬你都要出啲錢㗎，個節目又要人買埋，我做埋營業部啦，我使乜做藝員呀！自從嗰次之後，我都憎到極喇，叫我做啲嘢我都唔睬佢，好多新嘢都唔畀佢。」
問到可擔心被雪藏？朱翁說：「有乜雪啫？我一個節目之嘛，每個禮拜得一集，一直得《文化廣場》一個節目，都係因為我鍾意藝術同音樂。」他透露明年6月約滿，無綫暫時未有人斟續約，但已有其他電視台向他招手。
|
鍾意就快D Share啦！
|
|
|