黃子華自導自演的賀歲檔電影《乜代宗師》即將上映，最近有網民發起罷睇「紅色」賀歲片，其中《乜代宗師》就被批為一星，即「有討論空間的製作 」，原因是有人覺得黃子華的新戲在深圳取景，不是香港人電影。
黃子華今日在FB開live，就網民的指控回應，他說：「大家知我最近拍咗套戲，有人話黃子華收咗幾百萬片酬，剝削咗工作人員，以致有啲戲唔夠錢，要返大陸拍。」子華大吐當中苦水，透露原來自己沒有收片酬之餘，還要賣樓換取開戲資金，他有點激動說：「套戲係剝削所有人，每個人都俾我揼心口，唔該唔該，平啲平啲平啲，因為真係唔夠錢。我自己點呢？我自己係做編劇、導演、演員，但一毫子都冇收過，唔單止係一毫子都冇收過，真實情況係我賣咗層樓，嚟拍呢套戲嘅。」
子華澄清電影不是合拍片，他解釋：「大家都知咩叫合拍片啦，呢套唔係一部合拍片。我第一日拍呢套戲，心態就係想完全拍畀香港，一套香港嘅戲。子華說之所以不選擇以合拍片方式，因為4個字——自由自在，他說：「我想好自由自在拍呢套戲，無論題材或表達嘅手法，我唔想有人去過濾我點樣拍，有乜可以拍，有乜唔可以拍，我想自由自在，忠於我嗰個戲嘅概念去拍嗰部戲出嚟。所以唔係一套合拍片，真係香港人投資，香港人賣樓，拍畀香港人睇，我嘅心態係咁。」
賣樓開戲，子華說沒考慮過回本：「我冇信心，輸少當贏。我冇諗過賣咗層樓，可以幫到我買多一層樓，基本上以我現在呢個budget係冇可能可以返到本，甚至乎我賣咗呢層樓，佢有冇可能返番間房，或者一個水龍頭，唔緊要，但我可以自由自在拍呢套戲！好唔好睇，點知啫，但起碼我忠於自己。」
對於有人質疑電影返深圳開工，子華都有解釋：「香港情況係點大家都知，對上我拍嘅係《一蚊雞保鑣》，拍咗28日，當時已經有人話我奢侈，你嗰套我拍3部都得，自問冇咁嘅能力。我有問過啲監製，我賣樓可以拍幾多日？可以拍15日，但我套戲要拍50日，我現在好似起一層樓咁，我要起一個堅固嘅樓，要夠膽畀人住，畀人睇嘅樓。可能有導演好熟，好快拍完，但我冇咁能力。因為要取景，仲要廠房，都係錢嘅問題，如果要喺香港拍，可能我要賣埋我住緊嗰層，我媽住緊嗰層，但其實我阿媽嗰層係租嘅，所以其實都唔夠錢拍，我又想做到最好，只能夠行到呢一步。」
子華最後形容自己是儍佬：「全行都認為我係儍佬，賣樓去拍，99%冇得返本。面對咁嘅環境，我只想講返真實情況畀大家聽，睇唔睇，唔係好緊要，多謝大家。」
|
鍾意就快D Share啦！
|
|
|