2020年2月24日星期一

【頭條獨家】外遊食好西虛不受補李司棋返港咳嗽自我隔離 #李司棋

【頭條獨家】外遊食好西虛不受補李司棋返港咳嗽自我隔離

司棋姐雖置身空曠的馬六甲遊船岸邊，仍口罩不離手。此行連食兩日，虛不受補搞到回港後有幾聲咳。

最近疫症肆虐，李司棋竟然出trip，月初時相約10幾個圈外老友去咗大馬豪飲豪食5天，日日團體聚餐食好西，因為食咗唔少補嘢，回港後開始有幾聲咳，為免引來恐慌，司棋姐即自我隔離，留喺屋企做「宅女」，煲劇過日晨。她又強調，就算喺疫情下同朋友聚餐都會保持清潔衛生，多年來習慣用公筷。採訪：方騫平

大馬之行喺兩個月前開始籌備，當時疫情未算嚴重，直至出發前愈演愈烈，「當時大家心情都有啲亂，但既然決定咗就去啦，無謂大家掃興。今次我哋去咗馬六甲，呢度10幾年前曾經去過，對呢個小城風光留下好好印象，今次重遊舊地變化好大，最正係欣賞一個講鄭和遺蹟故事嘅舞蹈表演，聽聞疫前一票難求。不過，當地人冇乜帶口罩，反而我哋喺人多嘅場所都有戴。今次包咗部中型巴士，請埋導遊帶隊周圍玩，只係問咗句『有冇口罩呀？』導遊就撲到畀我哋，照顧周到。而且當地有朋友招呼，變咗好食好住，食咗好多鮑參翅肚，至愛榴槤、仲有名貴吉利魚等。」問她可有擔心團體聚餐容易演變成「病毒派對」？她說：「我哋有用公筷，都OK嘅，成班團友梗係會一齊食飯，冇理由捧住個餐坐開食嘛！但返嚟一定少咗聚餐，更何況向來我食得補嘢多，係會有啲咳，為己為人做宅女好過。」