踏入鼠年便行運，問李施嬅今年想行事業運還是桃花運？她魚與熊掌兩者都想得到：「事業運先啦，兩者比重八二喇，我啱啱離開TVB，差唔多一年，好多新事物、新嘗試等住我，好需要人哋畀我極強心針，同時亦需要好嘅運氣，以加強我信心。」李施嬅雖然事業心強，但她都期待將來如同好姊妹胡杏兒一樣，擁有幸福家庭，「我都好想有一日，有自己屋企同小朋友，我知當我有小朋友時，一定會慢落嚟，唔係我唔想一路咁衝，我睇到身邊朋友，佢哋結婚生仔後，事業真係自然slow down咗，始終做媽咪，母愛係偉大，必然會掛住屋企同小朋友。今年我決定開盡turbo衝咗先，等過一、兩年就諗吓組織家庭。」李施嬅不敢以兩子之母的胡杏兒做目標：「佢生得好犀利，我冇佢咁勁，佢可能會仲要多啲，會不停繼續造（人），我唔想要咁多個（小孩），一個夠啦，要生嘅話，我鍾意生女，但生到小朋友都係好大祝福。我自己係女仔，我知道生女顧家，錫屋企多啲。我屋企有哥哥家姐，睇得出女仔貼心啲，過時過節屋企人食飯都係我同家姐安排。」
單身李施嬅身邊不乏追求者，十隻手指可夠數？她笑言：「咁又唔好數，怕越數越少，唔好話追求，大家認識了解最重要，去到而家唔係初戀喇，唔係十幾、二十歲，以前鍾意人哋送花追求，而家係想搵一個知心人，大家傾到偈，明白我、支持我去做想做嘅嘢。做我哋呢行，想去搵一個明白你嘅人好難，仲有要頂得順我工作同忙碌，對方要睇住我幕前談戀愛，真係要好高EQ，同好明白事理，圈外人同我哋拍拖會好大壓力，佢會俾人起底，所以要搵一個知心又明白事理另一半真係好難，大家又要互相支持。」李施嬅列舉了基本擇偶條件，還想附加，「靚仔會好啲囉，冇嘅都OK，人始終都會老，大家最緊要夾得到，佢一定要有上進心同孝順，呢啲最緊要，又靚仔又fit係bonus」
剛過39歲生日的李施嬅，思想越見成熟，近年演技亦大躍進，她解釋開竅跟閱歷有關，「我多咗靈感，特別我喺TVB最後嗰5年，我自己去到一個樽頸位，演戲唔上又唔落，自己好想進步，但又唔得，呢幾年又唔係拍到好多劇，公司唔係好多嘢拍。」李施嬅明白被動沒有用，她就主動四出找機會去試鏡和增值自己，過去5年點滴積累，書中得到不少啟發，同時也改變了自己過往的思考方法：「原來我以前諗嘢方法好錯，冇嘢做時千祈唔好坐喺度埋怨，應該積極啲，幫自己搵多啲其他機會，一直喺一個comfort zone就變成原地踏步，慢慢又會好多埋怨，其實身邊仲有好多道門可以去開，不妨試吓開第二啲門搵出路，去跳出框框。呢幾年睇好多書，繼續做好自己，抱住正能量感恩嘅心，努力增值自己就一定會成功。」
李施嬅在大台劇集《法證先鋒IV》中扮演高級法醫Dr. Man，並要解剖屍體找出線索，協助破案，她坦言童年有當醫生的夢想，「我姨媽係醫生，我受佢影響好想做醫生，我成日去姨媽診所，聽佢講關於做醫生嘅嘢。中學選修生物課，要解剖青蛙，我覺得好驚、好核突，見到血腥同內臟恐怖嘢，我嚇到想嘔。」李施嬅未能圓夢，但這次接演法醫卻過足戲癮，「始終電視尺度唔可以好血腥，屍體都係由真人扮，拍時成日見到好多唔着衫嘅人喺我面前，一晚一個又一個，男仔着肉色底褲，女仔就肉色內衣褲，唔係全裸，但見佢哋咁喺我面前都好尷尬，佢哋化妝都要全身搽白，冇血色，由頭化到落腳；解剖時我又要掂佢哋，扮死人仲要唔郁閉氣，佢哋真係好專業，個廠又凍，佢哋又要瞓上凍冰冰解剖鐵床，一瞓幾個鐘，所以有時放暖爐喺佢哋側邊暖住，演員真係有呢個專業，佢哋都辛苦。」李施嬅怕血腥，怎應付將來生B？「咁我睇唔到嘛，有布遮住。」李施嬅預告不會剖腹生產：「我要自然生呀，我覺得做媽咪係好靚一件事，由陀小朋友就feel到佢心跳，佢會喺你身體長大，雖然我想盡量自然，但都要有啲麻醉，我唔想咁辛苦，無痛分娩」
撰文：比華利
攝影、攝錄：陳慧安
服裝：ba & sh
場地：Hyatt Centric Victoria Harbour Hong Kong
-----------------------------
第三屆最港電影大獎
按此立即投票
-----------------------------
《果GYM》隨身播 健身壹App過！
一按即玩
來源 source: http://hk.entertainment.appledaily.com
|
鍾意就快D Share啦！
|
|
|