爆房page瀏覽人數大增 讀者話：乾淨房間最緊要
酒店業在肺炎影響下首當其衝，接二連三發現確診個案後更令人卻步，包括本地客人。可是新型的時鐘酒店卻能絕境求存，在最嚴峻的逆市下殺出條血路。爆房推介page的負責人牛牛曾經大戰過多間酒店，Instagram有過萬followers的他表示，近期收到很多讀者查詢有關時鐘酒店的資訊，反應甚至比肺炎爆發前更熱烈：「以前一日得幾個dm，而家一日收到十幾廿個。」讀者反映實況，牛牛的followers不斷上升，某程度上代表大家有意欲爆房才會突然接觸相關資訊。牛牛的讀者查詢中，很多人首要關心的是衞生情況，其次才是環境和價錢考慮，可見肺炎下大家對爆房的考量也稍有不同：「最近有好多新聞都係關於酒店攞嚟畀內地生做隔離，或者懷疑確診嘅個案係住過酒店，大家對住酒店個信心係大減咗好多。」因此，以往到酒店爆房的常客，不少都轉了會到新型時鐘酒店。
愛比疫症強 肺炎也要搞嘢
「酒店衰會接待大陸人囉。」九十後情侶學長和學妹本來都是酒店的常客，近來就轉到新型時鐘酒店爆房。在肺炎襲港下土地問題仍是問題：「屋企人係晒屋企，你想見自己男朋友有多啲身體接觸，我覺得爆房係其中一種選擇囉。」他們不時外出尋歡，疫情亦無阻他們親密的意欲：「最多防住疫咁扑嘢囉。」怕不怕因而感染？學妹說：「新型時鐘酒店只會收香港客，感覺上更安心。」學長覺得獨立冷氣是新型時鐘酒店跑出的原因：「沙士維景酒店就係咁樣瀨嘢，成棟要隔離啦。時鐘酒店係獨立冷氣，相對於中央冷氣，我有信心多好多。」在疫症期間，他們最先考慮一定是清潔方面：「喺Istagram會見到佢哋點樣消毒，個信心大咗；睇埋間房個廁所去水位，睇下有冇頭髮卡住，都會知清得乾唔乾淨。」
新型時鐘酒店更勝一籌 生意不跌反升
以接待旅客為主的酒店業固然慘淡，但只接待本地客人的新型時鐘酒店可謂是逆市而上。以時鐘酒店炮台山7號為例，負責人阿儀和拍檔都十分驚訝：「一開頭武漢肺炎出咗，真係爆到咁嘅時候，我哋就諗死啦，應該會靜㗎啦。」她們的生意從2月頭便開始回升，由最差全日房間無人問津，到現時1日可以做10轉客人，當中2月份的新客人更佔了整體八成。
現時阿儀將清潔時間和過程放在社交平台上，無疑加強了客人的信心：「有啲第一次嚟嘅都會話：『唔好意思呀，想問多少少關於清潔同冷氣嘅嘢。』而家每間房個消毒味都會加強咗好多。」獨立冷氣加上透明的清潔度，不論是酒店或是傳統賓館也是追不上的服務，牛牛也說：「舊式嘅時鐘酒店，佢哋嘅客人唔會知道究竟佢哋嘅清潔係點樣。」所以學長也跟着廣州大媽說了一句：「係啦，信佢哋（新型時鐘）唔驚啦。」
黃色爆房圈 清潔做足客人放心懲罰
牛牛也指出，現時不少讀者都想他介紹乾淨的「黃色」酒店：「大多數後生會幫襯一啲黃嘅時鐘酒店。」學妹也認為黃店時鐘會更有保證：「宣傳都係針對本地對性有需要嘅客人，如果佢表態咗自己係黃店，都會少咗大陸人夠膽去，甚至冇嘅。」阿儀的時鐘酒店將清潔時間由30分鐘加長至60分鐘，而且每一個接觸過的位置都會加強清毒：「真係有事，其實客人啦、我哋啦、清潔姐姐；個條鏈好大。」所以她也不敢馬虎，親身落場幫忙清潔。此外，阿儀在情人節時曾推出的抗疫套餐，除了基本附送的安全套外，仲加添裝酒精搓手液、KF94口罩，還有爆炸糖和「香港加油」曲奇，全是二人份量，正宗可以「又食又拎」。阿儀表示口罩和搓手液是希望可以派出消毒物資予有需要的客人。疫症蔓延也擋不住愛的誘惑，年輕人的性需要似乎打贏肺炎。爆房只是滿足一時需要的地方，新型時鐘酒店在疫情下或許成為了更好的選擇。
製作：果籽
編輯：鄒仲安
-----------------------------
識抗疫・有獎賞
睇片答啱問題送大禮：立即追蹤接收最新資訊
-----------------------------
動物蘋台，飽覽主子大小事！
-----------------------------
來源 source: http://hk.entertainment.appledaily.com
|
鍾意就快D Share啦！
|
|
|