2020年4月1日星期三

【頭條獨家】禁聚令致生意跌9成　杜大偉火鍋店有執笠危機 #杜大偉

【頭條獨家】禁聚令致生意跌9成　杜大偉火鍋店有執笠危機

政府上周六起實行「禁聚令」，令杜大偉經營的火鍋店生意一再受打擊！

鑒於新冠肺炎疫情嚴峻，政府上周六（28日）起實行「禁聚令」，令本港餐飲業一再受打擊！身為「倫哥火鍋私房菜」老闆之一的杜大偉，慨嘆本來已大受「邊爐家族」事件影響，至今生意額大跌9成以上，更面臨執笠危機，他說：「而家餐飲業已經去到冰河時期，無辦法。」杜大偉仍豁達地認為損失了的錢可以再搵過，目前最緊要大家齊心做足防疫措施！採訪：黎寶倫

早前有家族因火鍋聚餐而交叉感染，導致多人確診感染新冠肺炎，令不少市民對打邊爐都「避之則吉」，火鍋店生意急速暴跌！憑無線處境劇《愛．回家》系列入屋的杜大偉，早年以5萬元投資的「倫哥火鍋私房菜」愈「滾」愈大，最高峰時更擁7間分店，惜去年遇上社會運動，10月份約滿後便結束了深水埗同尖沙咀兩間分店，無奈年初再爆發疫症，使生意額雪上加霜！

無綫劇《愛．回家之開心速遞》仍趕工中，杜大偉指公司每日開廠前都會進行消毒，確保演員安全。

餐飲業陷冰河時期

杜大偉說：「其實區選後至新年前，我哋嘅生意都唔錯，但始終上年社會運動都守得好辛苦，所以追唔到幾多，到新年後跌幅好大，而家得番一間分店營業，仲要生意額好低，就算呢間有100%利潤，整體都跌8成，更何況入座率冇100%，所以生意都跌9成以上。若果疫情再擴張落去，相信絕對有結業危機，但無辦法，惟有做好心理準備，希望抗疫成功！」其實疫情大爆發前，他已未雨綢繆推出「懶人雞煲」外賣服務，目前僅得觀塘分店營業，其餘分店亦已暫停營業，希望盡量減低風險及止血。對於政府上周六實施「禁聚令」，杜大偉說：「我哋都會配合番措施，保持餐桌距離同限制每枱4個人，亦有提供足夠口罩同手套畀員工，而家都繼續送口罩吸引顧客。」