【頭條獨家】唱出雙重打擊心路歷程 林子博出新歌同香港人打氣
林子博近日推出新歌《男人心聲》，歌曲講述去年發生在他身上的事，包括面對愛妻患重病，以及被無線裁員的心路歷程，好到肉：「疫情下好多人同樣經歷緊失業同減薪，甚至面對健康問題，我係一個人辦可以勉勵大家，既然我都過得到，大家都可以捱得過的。」採訪：方騫平 場地：919 Studio
因為唱出心聲，錄音時林子博唱到聲嘶力竭，監製兼作曲人陳子敏都好滿意，大讚子搏好投入，但要提示佢要留力。子敏仲話子博把聲夠厚實，有潛質做歌星。林子博透露老婆董燕君(Shirley)同埋10歲囝囝卓楠係佢Fans：「阿囝成日喺屋企唱，但佢感受唔到歌詞意思。Shirley話首歌好好聽，但就話我用8、90年代嘅老腔嚟唱，咁我係聽『歌神』學友嘅歌大，亦好鍾意佢啲歌，自然會無意中模仿學友tone，自己唔係全職歌手，剛起步階段，未甩到學友影子。」
老婆病況穩定
問到子博未來會否再出歌，他說要睇市場反應，「唔可以自我感覺良好，其實做呢首歌嘅初心，係想記錄去年發生嘅事，不論件事好定唔好都要記低佢，咁下次先知點做。今次唱片公司都有派歌畀TVB，但我唔再係TVB人，唔知佢哋用唔用，冇所謂嘅，有好多平台宣傳，隨緣啦。」提到太太病況，他表示完成化療後最近兩次報告，每次腫瘤都縮細咗1cm，西醫冇乜治療好做，主要觀察住進度，他有感而發：「名利對我唔再重要，一家健健康康，日日攬住大家經已好開心。香港人經歷緊疫症，唔只窮人染病，連富豪、政要都會中招，咁有名有利又點呀？去到疫情都冇分喇，所以大家應該會感受到我嘅心情。」
來源 source: http://hd.stheadline.com
|
鍾意就快D Share啦！
|
|
|