王菲嘅嘢，有咩係謝霆鋒唔知？
想知樂壇天后王菲最鍾意同最唔鍾意食咩生果？問謝霆鋒啦，如果佢肯答嘅話！霆鋒自從和王菲世紀復合後，雖然愛得甜蜜，但更愛得低調，無論傳媒如何軟硬兼施，對於有關佢女友王菲嘅問題，霆鋒一係笑而不答，一係就轉身走人，絕少機會可以拗開佢把「拉鏈嘴」，成功喺佢身上「索」到王菲啲料。
不過日前霆鋒就喺內地節目錄影時「失守」，當主持人失驚無神問：「王菲最喜歡吃的水果是甚麼？」霆鋒突然如食咗「誠實豆沙包」好認真咁答：「橘子。」不過主持人就否定佢話：「是榴槤。」聽到答應係「榴槤」時，唔相信自己會記錯嘅霆鋒，表現得好激動，抗議話：「不可能，她不吃榴槤的。」
主持人見霆鋒咁大反應，就立即唱咗王菲首《紅豆》：「有時候，有時候，寧願選擇留戀（留戀同榴槤讀音相近）不放手。」當他知道被人「玩」後，不但沒有發嬲，且好怕醜咁低頭甜笑，睇到呢幕嘅網民，就留言話霆鋒派閃，叫單身狗酸爆。
來源 source: http://hk.on.cc
|
鍾意就快D Share啦！
|
|
|
