2020年4月23日星期四

發起嗌救命搵幫手演唱會周啟生為身陷絶境樂手籌款

繼許冠傑搞咗個Online Concert為通利失業技師籌款後，音樂人周啟生亦喺6月1日舉行「愛港@你+我」網上音樂會。

新冠肺炎全球大流行，香港過百場演唱會被取消，一班沒有固定收入的職業樂手首當其衝，繼「歌神」許冠傑搞咗個Online Concert為通利失業技師籌款後，入行40多年音樂人周啟生，數年前成立咗個「音樂人飲茶會」，凝聚前輩音樂人，眼見兄弟們的慘況，周啟生決定於6月1日，59歲生日當天，舉行「愛港@你+我」網上音樂會，他強調係一個嗌救命搵幫手嘅演唱會，而唔係籌款演唱會。

他表示，今次最緊要係幫到身陷絶境嘅香港職業樂手，亦可以畀到士氣佢哋：「好多音樂人好大花筒，又冇積蓄，仲要租屋住，之前社會運動，蘭桂坊夜場經已受到衝擊，𠵱家關閉晒夜場，有好幾個朋友話有半年完全冇工開，佢哋生活拮据得令人好擔心，好需要應急錢，初步目標籌到有25萬，可以分到畀50個本地樂手，每人5000蚊，等佢哋撐住先，捱到政府派嗰一萬蚊。當然應急錢愈多愈好，咁就可以幫到更多樂手。

由於成事件由構思到起動唔夠三日，連演出場地都未有，預計會唱10幾首歌，不過好多謝陳龍華做義務監製，黃龍德會計師事務所捐錢，兼免費做核數，百鳴哥（黃百鳴）半夜就回覆話捐錢，仲係一筆可觀數字。對於Sam Hui Online Concert都惹來負評，指他係「上一年代嘅產物」，周啟生就話唔怕：「我都就快59歲，都好out，人老但有用，對阿Sam係有讚冇彈嘅。」