武漢肺炎令全球經濟陷於停頓，公司倒閉、裁員消息不絕，效力商台接近20年的DJ細So（蘇耀宗）今日亦收到商台大信封，慘食「無情雞」，有消息指今次細So被炒，是由於他早前得罪商台行政總裁陳靜嫻所致。細So被炒消息一出，不少聽眾均替他感到不值，有人直指商台在這個時刻炒人好過份，甚至揚言要罷聽商台。
今日《蘋果》就此事到細So位於貝澳的寓所，他接受訪問時心情平靜，坦言失望多於不開心。「其實收到被解僱消息，第一時間係擔心屋企人會擔心我，咁我都有同佢哋解釋。無奈地而家全世界都話要共渡時艱，我就要同屋企人共渡時艱囉！」對於在商台工作20個年頭，青春心血如今付之流水。細So自嘲說：「本身都諗住做到老㗎，咁可能你而家覺得我老咗啦，哈哈，可以退休」
對於自己今次被炒，有指是由於得罪高層，細So表示自己不敢說是否因為這個原因。但就承認確實和高層在防疫問題上有過拗撬。「因為我哋做前線嘅，唔係淨係用office咁簡單，而係共用幾個錄音室同幾支咪，咁你之前都睇過一啲新聞，係關於密閉空間，甚至用同一支咪，咁就發生咗互相交叉感染，呢個係我哋擔心嘅問題。」
雖然收商台大信封，但令細So感到安慰的是其他同事都有send短訊慰問他，他特別提到森美。「哈哈，收到好多同事嘅message，咁有啲就唔出得街嘅，森美亦有問可以點幫我，其實都冇乜得幫，邊有彎轉？今朝CEO同秘書打俾我，話要同我終止合作，之後已經有人送（解僱）信同支票過嚟我屋企要我簽。我問佢哋幾時過去執嘢，佢哋話冇所謂，但聽朝我有個6-8嘅節目《好醒神》，佢哋就話會搵人代我，至於今晚節目《生活日常》，暫時未知會點安排，又或者有機會喺屋企做，如果係，即係今晚係我最後一個節目，都會諗定嘢準備。」他直言最感到可惜的，是不能再在節目中播歌，讓同路人抒發和抒懷。雖然細So抱期望能夠在今晚節目中好好和聽眾說再見，但《蘋果》收到消息，其今晚主持的節目已「被消失」，意味細So無緣在大氣電波和聽眾講bye bye。黃昏903網頁極速更換節目表，原本細So的節目時段，就改成了謝茜嘉、梁文禮主持的《叱咤樂壇》。
採訪、攝影：張俊銘、徐錦池
-----------------------------
【武漢肺炎】專頁
全民自救 抗疫資訊盡在《蘋果》
來源 source: http://hk.entertainment.appledaily.com
|
鍾意就快D Share啦！
|
|
|