由《蘋果動新聞》舉辦的「第三屆最港電影大獎」今日公佈賽果，劉俊謙和蔡思韵這對《幻愛》拍檔，擊敗一眾實力派前輩，捧走最港男、女演員獎，亦是繼香港電影評論學會大獎二人齊封帝后之後，再贏得最佳演員獎。黃綺琳憑《金都》奪得最港導演及評審團最港大獎兩獎；楊曜愷執導、講述長者同志的電影《叔·叔》奪得最港電影。而我最喜愛港片則由麥曦茵的《花椒之味》奪得。
後日將公佈第39屆香港電影金像獎公佈得獎名單，「最港電影大獎」或可視為金像獎的前哨戰。最港評審之一邵仲衡認為得獎名單實至名歸，非常貼題，他說︰「我最喜歡《金都》同埋《花椒之味》嗰種香港味道，唔知係咪咁啱，都係女導演。電影出嚟個種touch同製作方式，味道滲出嚟好細膩。最緊要中間睇到啲新嘅方向，就係我哋香港人做返啲香港人都鍾意嘅題材，人哋先會喜歡同鍾意我哋。我就聞到嗰陣自己人『啱食』嘅味，相信香港傳統電影文化一定可以傳承落去，唔會係地球表面消失。」
評審鄺俊宇認為賽果非常合理，得獎的幾部電影都「港味濃郁」。對於新人抬頭，他認為是好現象：「我覺得今年係香港情懷嘅回歸，喺舊年嘅夏天到而家，『我係香港人』嘅認同越嚟越強。我諗今年的確係一個好特別嘅一年，亦都希望能夠做到新舊交替。」
問到可擔心疫情過後，會因社會運動而影響電影業，鄺神認為情況剛剛相反：「正正係呢個運動，令我哋對呢個城市、呢片土地嘅歸屬感更加強。所以如果有類似嘅題目，我相信係反而更多人入場睇。」他又笑說可能將來有個「金色電影圈」（黃色電影有點不雅）：「即係有自己人撐自己人嘅感覺，我都係期待嘅。」
提到電影從業員，在這段時期手停口停，問鄺神認為政府可有做得不足？他說：「喺對上一次我喺立法會嘅場合都追問過，發現電影創意行業喺呢次抗疫防疫基金係近咪零受惠，政府喺以往有關嘅資助或推動都非常之少。」他以韓國電影為例，證明電影是一種軟實力，是向外宣揚城市的良策，奈何政府沒有當一回事。鄺神說：「政府能夠做到嘅嘢當然係政策上去推動啦。喺未來嘅時間，我喺立法會會繼續努力去跟進。」
另外，評審杜緻朗自言《金都》是個人最港心水，她說︰「好地道嘅題材，希望未來見到多啲香港文化特色融入創意。新人得獎是一件好事，男女主導演都是新人，見到行業比以往更接受新人。兩位最港男女我亦寄於期望，希望之後見到他們能在每個角色盡情發揮。」
「第三屆最港電影大獎」完整得獎名單：
最港電影
《叔·叔》
最港導演
黃綺琳《金都》
最港男演員
劉俊謙《幻愛》
最港女演員
蔡思韵《幻愛》
評審團最港大獎（由評審揀選）
《金都》黃綺琳
我最喜愛港片（由網民揀選）
《花椒之味》麥曦茵
-----------------------------
App內1-Click訂閱《蘋果動新聞》
按此了解更多
來源 source: http://hk.appledaily.com
|
鍾意就快D Share啦！
|
|
|
