- 【曾為黎明克勤伴舞】娛圈苦行僧 周家怡:磨練到自己唔好強求
- 21分鐘前
娛圈苦行僧
有人贏在起跑，垂手可得;有些人如苦行僧，幾番努力，才偶爾遇上一個機會。
由《瑪嘉烈與大衞》，到《歎息橋》，好戲的周家怡，做女主角一等四年。再對一次《導火新聞線》，也相隔一年。
不求承接，但求等到下一次有心人。
「現時比較好，因為我剛剛簽約新公司(英皇)，感覺上無咁緊張，知道有公司支援。之前的確好無助，擔心戲與戲之間嘅空檔，其實都有戲拍嘅，只不過係你想唔想拍。一來唔想咩類型嘅戲都接，有時候好想參與嘅戲，係一啲自己真係想演嘅戲，或者整個班底都好有心去做好呢件事，而唔係為咗數量，希望保持曝光率，所以其實係一種取捨。」
- Viu開台不久的劇《瑪嘉烈與大衛》，拍攝手法及細緻貼地的演釋帶來驚喜，觀眾打開電視，不用獨沽一味膠劇。唯一睇完要等四年，雙劍合壁的《歎息橋》才再面世。
- 癲覆港劇模式的《歎息橋》，愛突破求細膩的一群，吸引有追看性，睇慣膠劇的一班，不喜歡，很兩極。她與林保怡在劇中，一段不敢行多半步的知己關係，再一次看二人的默契戲味。
有種堅持需要成本
人揀你，周家怡也揀人。拍自己想拍的，這種堅持需要「成本」。她有一個不用愁，不用承擔經濟的家境，且是孻女。「爸爸做生意，從事有關大廈火險嗰啲，我有兩個哥哥，我係孻女，孻女孻心肝。
我屋企確實係我靠山，有呢個幸運，至少父母唔太需要我負擔，呢個其實係上天畀我好好嘅條件，唔係每個人都可以咁樣慢慢等，都需要為兩餐。我暫時嘅收入都仲可以維持生活，所以喺容許嘅情況下慢慢等。」她，踏入40歲了。
「家境令我可以任性，但入行咁多年我係靠自己，唔需要家人為我粗心，就算離開TVB時(2012年)，的確有段時間差不多用盡積蓄，不過又往往差不多喺呢啲時做，工作機會又到，真係咁得意。
你問我有冇等到曾經灰心想轉工，咁耐以嚟，如果我話無都係呃你，但當你想離開時候，又會遇到一套本身好想拍嘅電影，好似個天要留住你。」
舞蹈員出身 為黎明個唱伴舞
她的履歷是這樣:96年在許愿(李麗珍前夫)的星工廠做舞蹈員，曾為李克勤、黎明演唱會跳過，踏過紅館輝煌舞台；98年入大台藝訓班，Dancer轉做藝員，由跑龍套，閒角起跑，等了六年，在《金枝慾孽》宮女「白蘭」一嘗配角，曙光一現，又打回原形繼續閒角。06年《火舞黃沙》的「兔唇女」終於冒起，但希望過後，又回到失落，不獲器重，十四年在循環，12年決意跳槽到港視，雖然快樂短暫，但至少憑《導火新聞線》發光，證明她一直是隻潛力股。
- 電視台藝員之前，她是舞蹈員，在九十年代有名的排舞師林青峰學跳舞，更有份為四大天王的黎明及李克勤個唱伴舞。
- 當舞蹈員的時光，左一是她。
- 那年過檔港視，即成女一，一套《導火新聞線》亦不負眾望，證明她的實力，女一絕對勝任，之後發光之作拍成電影，繼續女一。
30歲報讀法律考10A
周家怡沒有大紅大紫，但戲比很多女一更細膩。她努力，也天資聰穎，2010年，老是被大台派演閒角的她，為給父母安心，30歲人報讀香港大學專業進修學院法律系，三年課程，13科中得到10A成績。「當時爸爸好多朋友都開律師樓，佢擔心我未來，就建議我讀書，我覺得無壞嘅，將來就算唔想做呢一行，都可以介紹我去朋友嘅律師樓工作，至少都唔係一張咩嘢都唔識嘅白紙。我覺得爸爸嘅說話都有道理，而當時我又未清楚了解自己，反正工作唔多，有時間就去讀。
當時有一種感覺，就係讀咗先啦，唔好理！但你問有冇打算畢業後即時轉行唔拍戲？就完全無呢個想法，尤其是讀完之後更加無，因為覺得讀law好辛苦，好黐線，覺得呢一科唔係人讀！我而家見到律師都會衷心佩服，覺得佢哋好叻，因為自己都經歷過，真係好辛苦。」
- 與莊文強，郭富城行電影頒獎禮的紅地毯，這些機會不跳出安全區，離開大台一搏，相信她不會遇上。
- 近年被發哥感染，愛上行山。她說自己的生活使費不多，衣食住行都簡單樸素，高消費興趣及玩意甚少出現在她身上。
假使世界不是你預期
在娛圈來來回回，每一次機會臨至是磨利刀，也當修行。「自己跑嗰段時間(冇公司撐腰)，磨練到自己唔好強求，好景時唔好只顧陶醉現狀，即係唔好太過緬懷；而逆境時亦唔好自艾自怨，因為所有事情總會過去，不停鑽牛角尖都無用，只會虐待自己。不過我亦唔係齋等乜都唔做，見到導演就毛遂自薦，好多導演都聽過。我喺導演會當晚，見到導演時都會自我推銷，叫對方考慮用我。我覺得只係講一句，有咩問題？
正如苦行僧，佢哋好努力去修行，努力係要自己付出，但最後結果未必像你預期。如果唔係自己預期嘅時候，就要學懂放下。但唔代表完全咩嘢都唔做，淨係坐喺度，完全唔係呢回事。」
採訪:Sukey
攝錄:LL Production House
攝影:黎嘉詠
場地:Sparkling House
----------------------------
壹呼百應 號召有心人 請香港人睇壹週刊
按此了解更多
----------------------------
APP 內訂閱
1Click 搞掂 輕鬆簡便
按此了解更多
-----------------------------
【昔日紙本檔案庫】
30年壹仔經典 壹壹重現！
來源 source: http://nextplus.nextmedia.com
|
鍾意就快D Share啦！
|
|
|