【新增杜汶澤回應】
昨日通訊局向港台發出警告，敦促嚴格遵守節目守則、商務及經濟發展局即時下令港台道歉，港台傍晚宣佈完成本季《頭條新聞》後將暫停製作，並向警察致歉。由王喜主持「驚方訊息」環節即時被腰斬，同時涉事集數必須下架。王喜今日身穿西裝在YouTube開live發表「忠__勇毅」離職演說。
王喜在直播多次強調只有警務人員才可以侮辱警隊，「真正侮辱警隊聲譽就是當值或休班時，干犯嚴重罪行，甚至乎可判刑的罪行，譬如偷睇人裙底、去高賣、強姦非禮無惡不作，身為反毒掃毒的部門自己去販毒，這些舉動才是徹底侮辱警隊，反而通訊局見到忠勇毅在垃圾走出來包着垃圾膠袋，有人認為呢啲舉動及陳設係侮辱警隊。」一向敢言的王喜直言「忠_勇毅概念」只是清潔香港最核心的方法，他續道：「將垃圾放在垃圾膠袋封好，然後放落有蓋的垃圾筒，這些不是政府在宣傳片中教大家如果正確處理垃圾的手法？」
王喜有兩件事要宣佈，第一、「忠_勇毅」在港台節目《頭條新聞》主持的「驚方訊息（驚訊）」不會再出現，強調是不在港台出現，他笑說：「多得通訊局作出呢個決定嘅人，因為我要喺度宣佈，多得杜汶澤，因為忠勇毅會繼續佢嘅職責，但喺杜汶澤旗下頻道裏面出現，擺脫廣管局條例，去到一個比較相對更自由的世界，喺杜汶澤支持同製作之下，我相信『驚訊』、『忠勇毅』同嗰個垃圾筒好快會再一次喺大家面前出現。」
其次，王喜有感今次這件事在社會造成這樣大的打擊，他收到許多朋友發短訊來問候，他續道：「問擔唔擔心個人安全，怕唔怕嚟緊經濟有困難，因為要用到乜乜局、乜乜局去處理呢啲事，怕唔怕日後好難再喺香港發展，我想話畀大家知喺噚日5月19日通訊局公佈呢個裁決之前，喺5月14日王喜電視台（喜台）已經成立，呢一個係收費電視台，有一班朋友幫手，就係想擺脫由人工智能產生無法抗辯的理由，不想被打擊收入，同時呼籲大家加入成為會員，不會放在公眾平台，我哋喺一個私密嘅平台傾吓偈、教吓我嘢，等大家有一個發洩同聆聽嘅地方，譬如一啲關於公眾利益的《警棍》，我會先放在私人平台，過一段時間才放喺公眾平台，希望大家可以支持同幫忙。」
「忠__勇毅」離職演說到尾聲，王喜稱「忠__勇毅」將要去一個可以講真話同聽真話嘅氣候裏面，繼續用嬉笑怒罵形式去諷刺時弊，把香港警隊遺害社會嘅林林總總，呈現給每一個市民收看，講到好多人問王喜曾當差，為何這麼憎恨差人，屢次指出香港警隊的錯誤，王喜深呼吸後再講：「我唔理有冇皇家呢兩隻字，警察本來就係市民喺危難當中嘅希望，但今日以鄧炳強為首嘅香港警隊，就係成為將市民推入危難當中嘅絕望。」
王喜沉默12秒再說：「好喇！好多謝有6千多位朋友睇直播，亦希望大家share個直播出去，有啲人可能返緊工睇唔到，大家唔使為我個人安全擔心，因為我會好好照顧自己，再一次講大家唔使為我個人安全擔心，我會好好保護自己，希望大家都好好保護自己，因為今時今日香港好危險，原本係香港嘅希望，佢哋調轉槍頭變成香港嘅絕望，所以好好保重，多謝每一個課金嘅朋友，我哋喺出面江湖再見。」
杜汶澤今日回應《蘋果》將《驚訊》搬到自己網台，他以短訊回應表示「食食下飯見到王喜個節目冇得再做，好鬼忟憎，即刻打畀佢（王喜）經理人，如果港台冇得做，介唔介意我哋幫佢拍呀。好多謝王喜咁畀面，同我哋台合作，其實佢自己拍都得啦。你知道啦每一個artist都好識保護自己，要拋開一啲門戶之見唔係咁容易，我覺得王喜做得到係真心為社會出聲，唔係為一己私利。正如我（FB）所講，要買到垃圾桶就拍啦。」
-----------------------------
App內1-Click訂閱《蘋果動新聞》
按此了解更多
來源 source: http://hk.appledaily.com
|
鍾意就快D Share啦！
|
|
|