41歲「雞佬」李雨陽近年經營過幾間食店，多得武漢肺炎，生意受挫，搞到唔係退股就係執笠，據聞前後蝕咗30萬。而家連北上工作都變零，加上太太鄭嘉詠即將生第二胎，難怪李雨陽直言：「經濟壓力大。」
疫情肆虐下，李雨陽工作量有限，只剩低香港開電視節目《Fit開有條路》，同大台前主播方健儀合作主持。向好嗰方面睇，多咗時間陪屋企人囉。話晒老婆大住個肚，而兩歲半嘅囝囝又勁好精力，出到街全程跳跳紮兼跑嚟跑去，李雨陽幫手睇住個仔係好事。亦好彩囝囝聽話，媽媽一揈手示意就會乖乖行返埋身邊拖手仔，唔會越叫越走。
雖則本港疫情放緩，商場人流亦唔多，但李雨陽一家都好小心全程戴實口罩。不過，銅芯抗疫口罩到手後立即出post感謝政府嘅李雨陽，今次並無使用，斷估係洗咗未乾。
老婆第二胎係囡囡，湊個「好」，而且已經籮咁大個肚，原來9月就生得。李雨陽話選擇私家醫院分娩，儘管費用唔便宜，但佢表示「都afford到」。問到仲會唔會再開新舖做老闆，原來又係個愛妻號，要睇老婆頭：「新舖冇呀，交畀太太諗。因為之前兩間小食店都係太太搞，主要睇佢意願。因為就嚟生，開得舖嚟BB又出世，然後唔方便去跟進就無乜意思，都係睇太太意願。」
未有計畫再做老闆，換言之幕前工作係主要收入來源，李雨陽表示繼續同開電視合作，傾緊個飲食節目，開正佢呢個前小食店老闆嗰瓣：「計畫去啲米芝蓮級、有名氣餐廳，就算唔係落手去煮，都想同大廚溝通吓、偷師學吓。」
除咗香港，其實李雨陽都致力發展內地演藝事業，做過電影主角添，可惜疫情令工作停頓。為頭家，佢話就算內地疫情反覆都唔理得咁多：「都要上㗎喇，因為嗰個(經濟)壓力都大嘅，盡量自己小心啲。」建黨周年、建軍周年、回歸周年全部上心，甚至電話都用華為，李雨陽咁有心係抵讚嘅，相信疫情一過就會守得雲開！
----------------------------
壹呼百應 號召有心人 請香港人睇壹週刊
按此了解更多
----------------------------
APP 內訂閱
1Click 搞掂 輕鬆簡便
按此了解更多
-----------------------------
【昔日紙本檔案庫】
30年壹仔經典 壹壹重現！
來源 source: http://nextplus.nextmedia.com
|
鍾意就快D Share啦！
|
|
|