本地時裝設計師鄧達智（William）於2018年9月9日與任職醫生的同性伴侶陳梓欣（Clement）結婚擺酒，翌年6月在倫敦簽紙註冊，昨晚是他們二人的結婚3周年，二人去了尖沙嘴某酒店Staycation，實行開房慶祝皮婚。
William今日在社交網貼了與Clement的慶祝相，當中二人在維港夜景下撐枱腳，更有查小欣、胡孟青等女性朋友做電燈膽祝賀二人，《蘋果》聯絡了William，他表示女性友人前來happy hour，大家在房間開香檳慶祝了一會，之後他與Clement過二人世界。William表示上周末已經慶祝了一次，昨晚正日如往來一樣，去酒店Staycation慶祝，他笑言眨眼過了3年：「喺檳城食榴槤開始呢後感情，之後公開面對大眾，就發展成婚姻關係，時間過得好快，對自己嚟講，9月擺酒呢日係緊張過6月註冊，仍然好記得嗰日心情好忐忑，好大膽行到呢步。」一向愛旅行的他表示若不是疫情關係，二人的周年紀念原定在曼谷慶祝：「我哋通常一年計劃定去旅行，原本噚日應該喺曼谷，因為想睇番自己物業，之後9月尾同10月頭就會去克羅地亞同意大利，而家機票取消剩12月去東京，希望到時可以飛到。」
問到二人結婚3年，加上他早前患上武漢肺炎，會否更加珍惜對方，他表示：「佢係做醫生，見過好多病痛，我自己之前都有病過做手術，所以一向都平常心，同埋Clement不時都會有少少小驚喜，所以結婚周年我哋唔會特別大肆慶祝，亦唔會互相喺呢日交換禮物，好似佢每年都會送一部手機畀我，佢係一個好實際嘅人，我哋去旅行又互相安排行程。」最後，William表示婚姻過了3年，對他來說已等於9年：「現今婚姻係好艱難，尤其係我哋呢種關係，所以覺得好難得，我自己覺得一年等於人哋3年，即係我當自己過咗9年，過咗7年之癢。」
----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
來源 source: http://hk.appledaily.com
|
鍾意就快D Share啦！
|
|
|
