被郭富城笑指「佢癡㗎」 楊千嬅自認：係黐線個黐
郭富城、楊千嬅及導演黃慶勳，日前接受香港開電視主播馬梓軒專訪。城城於戲中飾演流浪漢阿博，被問人生曾否經歷潦倒時刻？他坦言：「慶幸係未嘅！不過細個我有個朋友仔做清潔，所以拍攝時我操控嗰部清潔機器，感受好深！劇組冇人識用，得我識用，所以呢個就係人生經驗，但如果我冇呢個經驗，我唔識用部機，我又點能夠說服阿博呢個人物角色呢？」
飾演落泊歌女的千嬅，戲中對愛情義無反顧、不離不棄，城城聞言即笑稱：「佢癡㗎！」千嬅謂：「現實中我真係黐㗎哈哈！但唔係癡心個癡，係黐線個黐！其實我覺得唔同年紀，閱讀愛情亦唔一樣，尤其是女人！後生時如果你好多本錢，ABCD可以多個E！但到30幾歲仲係孤伶伶一個，會開始主動出擊！到40幾仲係自己一個，真係會孤獨同唔開心！希望有一個靈魂伴侶，佢係識得同你分享同分擔！」
副導演出身的黃慶勳，是次肩負重任首執導演筒，他坦言拍攝過程緊張。城城更表示首日開工，有乘機「測試」導演功力，他說：「當日我拍完快餐店戲份，拍完之後一齊睇playback！我留意到導演睇完之後，佢眼神好似同我講可以再好啲！然後再拍，完成後我又望吓導演，佢有少少微笑同點點頭！呢個就係我想要嘅嘢！」
來源 source: http://hd.stheadline.com
|
鍾意就快D Share啦！
|
|
|
