2014年12月26日 星期五

[忽然1周 - 1013] 進擊的大島優子 大島優子,MW,




大島優子俾 AKB48成員高橋南爆料後,話佢有鋪除衫癮。老實講,有優子嘅身材同 36D cup豪乳,唔拎出嚟晒吓,真係暴殄天物㗎!

亞熱帶

進擊的大島優子

日本女藝人大島優子自今年3月於「 AKB48」畢業後,先拍咗一輯超級大膽嘅性感寫真集試水溫。

寫真集推出後,成績比預期好,令佢雄心頓起,索性全力向戲劇發展,仲話要向人氣女星吉高由里子看齊。

話時話,優子真係有啲運,早前就憑電影《紙之月》獲得「第 39屆報知電影獎」、「橫濱電影節」兩個最佳女配角獎。而喺今年冬季日劇,佢又拍住 SMAP成員草弓剪剛合演改編韓國高收視劇集《錢的戰爭》,成為今個冬季最期待劇集。

睇嚟佢嘅轉型已經成功踏出第一步﹗

同為 AKB48畢業生,前田敦子雖然比優子早一年畢業,但論氣勢,敦子似乎比優子弱咗啲,起碼到目前為止,敦子仲未有一部劇集或電影令佢賺到知名度。其實論演技,優子同敦子半斤八両,但佢勝在世界女,識得分前後輩,所以人緣唔錯。而且第一次拍電影《紙之月》,佢就連獲兩個電影獎項嘅最佳女配角,呢啲咪時也運也囉。

26歲嘅優子童星出身, 7歲時,俾阿媽推入劇團 Central Group。直到 05年,加入女子組合「 Doll’ s Vox」,但未夠一年,轉投秋元康嘅「 AKB48」,成為 team k成員,直到今年 6月畢業。

喺 AKB期間,優子曾因總監秋元康偏袒前田敦子(右)而頂住度氣。但兩人畢業後,論氣勢,敦子完全輸晒。相信優子條氣肯定順番晒

講起嚟,優子同香港都好有緣份,事關佢都嚟過香港幾次,最近一次係畢業前為日本動玩節嚟香港做宣傳。

寫真集《脫了吧》入面嘅優子,完全大解放,不單酥胸半露,更擺出誘人姿勢,真係玩很大。

執到好籌

優子單飛後,工作量唔錯,加上佢積極進取,除自費去西班牙拍寫真,又唔揀嘢做,大小綜藝節目一叫就上,因而積聚咗啲人脈,可以黐住宮澤理惠拍《紙之月》。

最好命嘅,係拍到 07年喺韓國創下平均 31%高收視率嘅《錢的戰爭》。而男主角則係 SMAP嘅草弓剪剛。故事講草弓剪剛因為老竇負債自殺後,變得一無所有兼被追債,走投無路下被迫為放高利貸老闆做事。而優子就飾演佢高中時代恩師個女,其後兩人跟木村文乃飾演嘅未婚妻,發展出一段糾纏不清嘅三角關係。

優子一直以吉高由里子為追擊目標,據講佢見到由里子初出道時主演嘅電影《蛇信與舌環》,因為有全裸及激情牀戲而締造話題,佢亦準備有樣學樣,話唔介意喺新片入面全裸,仲話可以演得比由里子更激情咁話。咁樣進擊法,抵你紅

喺 Doll's Vox時期,十幾歲嘅優子人肥兼有塊西樵大餅面,同依家個樣比,簡直判若兩人。

上個月,優子(金色衫)以師姐身份,帶領 HKT48喺台灣開騷,又唱又跳,依然戮力。

喺電影《紙之月》入面,優子飾演有機心女職員,為陷害宮澤理惠,竟然𠱁宮澤穿櫃桶底。

日版

韓版《錢的戰爭》係韓國 07年度收視最高劇集,主角係朴新陽同朴真熙;日版則以草弓剪剛搭大島優子,並定喺出年 1月 6號首播。

韓版

吉高由里子雖然靠脫出道,但卻無阻其人氣,成為今年紅白大賽紅隊主持人。有吉高成功先例,難怪優子會視吉高為進擊目標。



鍾意就快D Share啦!
Related Posts Plugin for WordPress, Blogger...