喺酒店入面冇北風吹，暖笠笠㗎。（設計對白）
爆壹爆
呂志和深宵出尖東蒲
唔少人鍾意出尖東夜蒲飲吓酒，爆哥一位喺尖東海景嘉福酒店做嘅朋友康哥爆料，原來佢哋大老細呂志和都有呢鋪癮，呢排逢週六晚就會出動，坐住佢架五百萬以上嘅「碌死老鼠」到酒店，之後神神秘秘一直留至凌晨都未走人，經理同人講係巡視業務，但凌晨所有人瞓晒，仲來巡視乜嘢咁巴閉，又冇解釋喎。
康哥鬼馬咁笑笑口講，大老細鍾意望海嘅酒店房，入去之後就好耐或第二日先出來，至於有乜嘢具體業務需要佢老人家親自巡視和慢慢審查品評，就真係冇人知。不過員工之間，都有提起去年二月《壹》仔個封面故事，當時大年初二凍冰冰，但影到呂志和同兩位𡃁模由酒店暖笠笠行出來，搞乜東東，呵呵，你懂的。
黑社會曲線表示身份
讀者可能都知道，若果黑幫向其他人「撻朵」，表明自己係黑社會成員，咁就會干犯「自稱黑社會」罪行，坐得監㗎。不過，喺某啲場合，江湖人士又必須要表示自己個身份，咁應該點樣響朵，而又唔會踩界呢？爆哥上星期喺向華勝的追思會上，就見識到江湖人士對自己單位嘅暗語表述。
好似勝和咁，油尖旺揸 fit人「四眼柱」送來花牌，佢就叫勝和做「勝利堂」，而水房前任同現任坐館「大孖」同「子逢」，就以「安樂公司」稱呼，眾所周知，水房正式名稱係「和安樂」。而新義安兩兄弟「金仔」和「遮仔」，就以「灣仔仝人」來稱呼，凸顯二人喺灣仔區嘅分量，而新義安，則以義安公司名義送花牌，果真奇招百出，黑幫都齊齊創業。
澳門冇晒香港疊碼仔
有香港古惑仔訴苦，話即使珠海澳門關卡廿四小時通關，都無補疊碼仔生意，話一來受賭場生意轉淡影響，二來亦是最致命係而家澳門疊碼仔幾乎清一色係大陸人。搞到咁，事關賭場主要客都係大陸人，所以內地疊碼仔壟斷內地客，加上佢哋人多勢眾，港澳疊碼仔早已無定企，成個賭場都係講國語。
澳門水房而家個坐館大海都係大陸人，就知大陸疊碼仔真係「人才輩出」，加上水房賴之前任及現時紅顏知己，小鳳姐及曹榮姐，都係由疊碼女做起，之後才埋到水房賴身邊受重用，由於前車可鑑，現時唔少澳門內地疊碼女，都望可利用幾分姿色，疊疊吓碼，可以疊出一條富貴路。
爆哥乜料
金融界撈家，穿梭黑白政商界，朋友遍布旺角至中環，每星期都八到唔同料，同《壹》仔讀者過吓癮！
|
鍾意就快D Share啦！
|
|
|
