周焯華高調拖華嫂去派對，俾足老婆面子，為左右逢源做安撫工作。
探熱針
Mandy Lieu海外安胎 華嫂四個月肚照食河豚?！
今年八月爆出 Mandy Lieu搭上人夫、太陽娛樂老闆周焯華（洗米華）後，兩女爭一男廝片連續劇劇情不斷更新，人肉坐墊 Mandy Lieu發力滲透，愈擸愈多；不再死忍的正印高調繑夫出巡更傳有孕。點知「華種」王牌你有我都有，隨即爆出 Mandy Lieu跟華嫂同樣有咗四個月，兩個女人預產期撞埋明年五月，搞到周焯華一年抱兩，真係劇力萬鈞。
不過，佗有「華種」嘅華嫂，不單酒照飲，近日更被發現連有中毒風險的河豚刺身都照食？！咁勇！究竟是輕敵，還是同你死過？
無人夠膽勸阻
大婆二廠招來招往，為鎮住張人肉坐墊，一直以靜制動的華嫂忍唔住出招，先在微信及 facebook表心跡「不喜歡的毒死就好了。」、「你只是個賤人。」緊接休息了十一年的肚皮，亦因 Mandy Lieu過晒界而再啟動，傳出她佗住「華種」四個月，預產期明年五月；被拍到買 BB衫，專攻藍色，暗示佗仔的她更高調拖住老公周焯華，現身派對，將一切鋪排得妥妥當當。
跟小三 Mandy Lieu作戰，身懷「華種」無疑是作為鬥法一大籌碼，但華嫂卻有別一般孕婦！應酬不減，亦冇戒酒，相當唔錫身！
上週五（十二月十九日），華嫂還踩住三吋高踭，現身老友鄺美雲的珠寶展，之後跟黃栢高等拉大隊到日本高級食府「鮨銀座」歎河豚刺身，大肚婆無顧忌唔戒口，嚇窒大家。
「嗰晚 Heidi當自己冇嘢咁，唔單只食河豚，仲飲咗啲酒，有咗都唔忍口，大家都嚇一跳，但冇人夠膽出聲叫佢唔好食。」知情者說。
老公周焯華日前出席公司有份投資的電影《十月初五的月光》澳門開鏡儀式時，被問華嫂懷孕一事，亦答得奇怪：「佢身體冇問題……肥咗啫！」
睇中三百萬藍寶
周旋於兩個女人之間左右逢源，風流的周焯華唯有做黃大仙，有求必應！早前獲老公送贈千萬珠寶安撫的華嫂，在鄺美雲的珠寶展再睇中三百多萬寶石首飾。
「佢睇中一套藍寶石，即場就打電話同老公講。三百幾萬對一向疏爽嘅華哥嚟講好濕碎，其實依家華嫂要乜，華哥都會滿足老婆，喺出面亦會俾足面佢，對 Mandy Lieu，華哥一樣照顧周到。」知情者說。
心煩有排坐唔正
兩女格鬥，華嫂高調拖老公攞彩當晚， Mandy Lieu亦不願坐以待斃！失驚無神出現養和醫院睇急症，按肚，掩嘴作嘔狀，有孕舉動做齊，更有傳她在醫院做埋孕婦超聲波檢查；未幾即傳出她為周焯華佗女四個多月，已返回大馬安胎，順便替男友打點當地業務。
撞都冇咁啱，又係有咗， Mandy Lieu亦同樣唔錫身，上月流出人肉坐墊片，照計她已有孕三個月，卻任由賭到興起的周焯華 Un住坐，零護胎意識。
有指未搵到機會坐正的 Mandy Lieu，遭對手「佗仔」穩固地位痛擊，小三招牌搣甩無期，近日相當心煩。
「問題變得愈來愈複雜，有咗但冇名分，佢情緒唔係太穩定，早排佢飛咗去台灣，都有搵朋友傾心事開解吓。」 Mandy Lieu身邊人說。
對於 Mandy Lieu懷孕、經手人是周焯華，其經理人 Marie並沒否認，還聲言「遲啲大家都知」。據了解， Mandy Lieu現時已全面停工。
正印二廠鬥法玩鬥大，將進入高潮。
大仔撐繼母
繼母與老豆新寵 Mandy Lieu互片，遠在英國的周焯華兒子 Pakco（周柏豪）隔岸觀火，即使沒直接表態，但卻將一張攬住繼母和妹妹的合照晒上網，又大讚其 family夠 cool。周柏豪擺明撐正印。
|
鍾意就快D Share啦！
|
|
|
