葉家寶暗示股東無意再注資，七百多名員工十一月份的薪金隨時凍過水。
探熱針
亞視唔夠錢出糧 新聞部搶閘罷工
亞視冇糧出，勞工處決定插手，星期一（十二月二十二日）派員踩入亞視，並為員工舉行簡介會講解勞工法例下的權益。
傳聞平安夜會向員工發放十一月薪金，但亞視執行董事葉家寶會見傳媒時，曲線式否認：「管理層接觸過王征以及亞視大股東黃炳均尋求資金，但佢哋話過去加埋注資咗二十億，已經完成歷史使命。」
據知，要做到七百多名員工人人有糧出，涉及款項高達一千五百萬，葉家寶坦言公司唔夠錢：「我哋唔想只有部分人有糧出，或者出住一半先，過多幾日公司會再開會商討。」對於公司欠薪採取強硬態度的新聞部，當日亦發公開信，講到明「無糧出、無新聞」，隨時令亞視違反《廣播條例》，莫講話賣盤、續牌，分分鐘要關門大吉。
藝人反應冷淡
星期一早上勞工處派員到大埔亞視總台，為員工登記資料，並即場講解勞工法律及權益。據知，當日早上有近百名亞視員工出席勞工處講座，當中以幕後為主，藝人反應一般。
自爆戶口得番七個九，要四十萬為爺爺辦理身後事的「亞洲先生」黃集鋒，居然有錢坐的士返公司了解情況，他解釋：「（冇錢）報導出咗街之後，爭我錢嘅朋友都主動還錢俾我，有近六位數字，暫時經濟冇問題。」
將於本月三十一日跟亞視滿約，黃集鋒決定唔留低：「續約要 cut一半騷，一半人工，仲要簽一年生約一年死約，長痛不如短痛。」
至於「六合彩之子」蔡國威則坦言即使公司冇糧出，都只能緊守崗位：「我做《六合彩》直播，唔可以話停就停（工），公司同馬會嘅相關機構應該要再諗辦法。」
股東閂水喉
至於亞視新聞部，繼早前向公司管理層發出最後通牒，本週一再發出給公司及廣大市民的公開信，指欠薪事件已造成部分員工經濟出問題，如果公司未能在本月底前發放十一月薪金，新聞部上下員工會在明年一月一日開始，將不合作提供正常新聞編採，或會導致暫停播放新聞。
對於員工欠薪訴求，亞視執行董事葉家寶會見傳媒時，指管理層早上曾召開緊急會議，暗示股東無意為欠薪事件再次注資，公司手頭上的現金，亦不足夠發放薪金給七百多名員工。
「公司有考慮出『半份』，但資金都係唔足夠，（總共要幾多錢？）大約一千五百萬，所以唔肯定聖誕前可唔可以發到工資，而過往亞視嘅收入，係唔足以發放員工嘅薪金，要靠股東注資，希望員工可以緊守工作崗位，因為停工會違反《廣播條例》。」
另外，葉家寶聲稱現時有二至三名買家有興趣洽購亞視，公司正密切關注進展。可見亞視幾名大股東王征、黃炳均、盛氏家族及蔡衍明等，只一心一意等新買家，對員工冇糧出，完全漠不關心。
|
鍾意就快D Share啦！
|
|
|
