掃呢頁CODE去手機

2015年1月21日 星期三

[FACE - 400 - 大專校園] 最紅 cover dance舞團 城大妹翻跳少時上位 少時,少女時代,MF,




阿魚話以前淨係 set部機喺鏡頭面前拍拍拍,但𠵱家就會有專業攝影師揸機 zoom下大頭、半身,多角度拍攝,佢哋正為 VIXX來港演出作綵排。

Main Camp

最紅 cover dance舞團 城大妹翻跳少時上位

K-pop hit到核爆,女團有靚樣同長腿𥄫,個個跳舞更加 sexy又好睇,難怪各天團來港開演唱會,啲飛成千蚊都瞬間沽清。咁又係,唔通畀千幾蚊入場睇國際 G.E.M.成晚「×叫」咩,連螢光手帶都話要收番咁掃興。

不過身為一名忠實韓飯,齋睇演唱會又點止到咳?唔少飯就索性學埋偶像舞步,組隊翻跳拍埋片過癮。現就讀城大工管系 Yr.2嘅謝嘉瑜(阿魚)就話 K-pop舞步其實唔難學!佢自學女團舞步之餘,仲成立埋翻跳 K-pop歌嘅團體 EchoDanceHK。舞團成立 4年,拎過好多韓國 cover dance大賽冠軍!連女團一姐少女時代所屬經紀公司 SM娛樂都大讚阿魚團隊跳得神似, 2011年更選佢哋做冠軍,果然猛料。

上週四( 15日)本刊到新蒲崗排舞室採訪,喺𨋢口已經聽到 VIXX嘅激動澎湃快歌〈 Error〉,甫入排舞室更以為自己睇緊啲韓星綵排,只見阿魚及 6名隊員專注綵排,阿魚喘氣說:「我哋準備緊聽晚( 16日) apm嘅商場騷。」為咗今次演出,阿魚特別一個禮拜練兩日,每次練足 3個鐘,「我哋習慣晒啦,有時韓星有新歌出,我哋仲會連兼職都唔返,就係為咗喺屋企同排舞室苦練,快啲出到片放上網分享!」

威到韓國

EchoDanceHK啱啱喺 2014韓國 K-pop cover dance festival香港區成功脫穎而出,仲喺全球決賽裡面奪得最受歡迎大獎,超犀利!

贏埋泰妍手印

呢個非一般嘅金“掌”獎,係 Echo喺 2011年贏咗 SM Entertainment舉辦嘅 Girl’ s Generation“ The Boys” Worldwide cover contest冠軍,少時泰妍送俾佢哋嘅手掌印。

要 1星期內出到片

香港翻跳組合有至少幾十隊, YouTube更有海量的韓星翻跳片,但阿魚嘅 EchoDanceHK就係眾多團隊中最受歡迎, YouTube有 5百萬點擊率, 2011年更代表香港飛到韓國參加 cover dance比賽,成功揮低千多隊對手奪冠,連韓國 SM娛樂公司睇完都大讚佢哋舞步夠齊,又跳得神似。

阿魚解說:「可能我哋成立咗 4年幾,係香港 cover dance嘅先頭部隊,出名啲,我哋𠵱家有 22名成員,有男有女,負責跳唔同歌,加上我哋出片又快,要務必一星期內出到片,我哋冇跳舞底,全靠狂煲佢哋 MV自學,好似 2013年少女時代首〈 I Got A Boy〉推出咗 1個禮拜之後,我哋就排好舞兼整好晒啲舞衫,再出埋旺角拍 MV快閃,可能因為咁,啲人搜尋首歌嘅時候就會見埋我哋段 cover dance啩,所以慢慢多人識,一係唔跳,跳就要最 pro!」

VIXX前晒舞

據阿立講,其實今次同 VIXX同台演出,主辦單位 apm商場於一個禮拜前通知,所以臨表演前一晚佢哋喺排舞室排至凌晨都未走。

舞衫全 D.I.Y.

難得阿魚團隊出騷嘅衫,跟原版韓星有得比,阿魚話全部都係 D.I.Y.,「因為韓星啲舞服好貴,又浮誇到市面上冇可能有得買,而且大部分喺 MV裡面 detail到一塊珠片一條拉鏈,我哋都係喺深水埗或者淘寶買完材料再自己車上去。」

為咗跳得更神似,阿魚犧牲與同學約食飯及唱 K時光,佢仲放棄大學生指定動作「做兼職」,不過阿魚完全唔覺可惜,「個個同學只係返學、做 part-time,我就可以有我嘅女團男團,有錢都買唔到」

cover dance有錢搵

EchoDanceHK團長阿立:「我哋收團員主要係睇佢哋嘅神韻,跳舞叻唔叻係其次。」

K-pop cover dance其實係一群韓飯翻跳偶像歌曲,再自拍放上 YouTube分享的玩意,玩家除了學足偶像舞步,還會自制 A貨舞衣及飾物。以 EchoDanceHK為例,佢哋仲會學足正版 MV拍法,搵埋類似場景,由於像真度高,連商場及政府大型活動都俾錢請佢哋表演,有得玩又有錢收。

演除夕騷

出道 4年, EchoDance𠵱家總算跳出名堂,連政府都會搵佢哋出騷,好似沙田區除夕倒數活動,不過阿魚話 90%收入都會用番落租排舞室和整舞服。

經典造型

阿魚團隊無論造型、舞步、場景都跟到十足十,難怪咁受歡迎,大家又話似唔似?

扮少時 Jessica

你睇吓佢哋跳少時〈 I Got A Boy〉,連件 Batman tee都抄足,咁有 heart去邊到搵呀!

相似度:★★★★

學 AOA咬手指

人哋韓星拍 MV,有幾十人服侍是常識吧! EchoDance成員取景、服裝都一手包辦,要腰有腰、要腿有腿!

相似度:★★★

抄 Infinite Chok

軍人帽,有!黑色外套,有!佢仲指定黑眼線加埋咪嘴 rap,同正版〈 Destiny〉有得揮。

相似度:★★★★

跟 BTS彈

話樣堅料俾大家知,記者喺 cap圖嘅時候,佢哋連正版 BTS嘅〈 Boy In Luv〉黑衫變白衫、白衫變黑衫彈起都抄到一模一樣。

相似度:★★★



鍾意就快D Share啦!