2015年4月9日 星期四

亞視員工直播聲討王征 袁潔儀:係男人就企出嚟! [壹週刊 - 1309] 袁潔儀,亞視,王征,潔儀,M1,



探熱針

亞視員工直播聲討王征 袁潔儀:係男人就企出嚟!

亞洲電視成為香港首間不獲續牌的免費電視台,逾半世紀基業敗在王征手上,當事人繼續龜縮。根據法例,亞視仍要廣播至明年四月一日,但若不獲股東注資,就算變賣資產,公司最多捱到三、四個月。

亞視員工叫王征積陰德盡快交代「後事」,還員工一份尊嚴,亞姐袁潔儀更公開呼籲王征:「做番個男人!」

員工撲水出糧

面臨結業的亞視一再拖糧,執行董事葉家寶聲言亞視每月營運開支逾二千萬元,如果股東不再注資,靠出售節目版權包括《亞洲先生》、《亞洲小姐》等品牌,約莫可支撐三到四個月。另外,葉家寶亦會與香港電視主席王維基商談合作,研究可否引入港視劇集,令亞視繼續播放。

員工自行籌錢出糧,世界奇聞!亞姐袁潔儀、「六合彩之子」蔡國威、亞視助理副總裁冼偉智、製作

總監葉成昌和高級編審許燕紅接受本刊訪問時,異口同聲要求王征公開

交代。

高級編審許燕紅說:「佢(王征)既然係我哋老闆,不如返嚟同所有員工交代。」袁潔儀亦拍枱說:「做番男子漢要做嘅嘢!」

「如果(王征)覺得自己咁偉大,話咩光榮歷史任務,咁不如返嚟交代,我哋直播。」大家和議許燕紅,並相信肯定高收視。

製作總監葉成昌說:「佢夠膽返嚟先講。(在場袁潔儀插口說要先呼籲員工冷靜!)仲要叮囑大家唔可以帶兵器,身上唔可以有士巴拿,但道具組攞士巴拿係好合理嘅!」

左起:亞姐袁潔儀、「六合彩之子」蔡國威、亞視助理副總裁冼偉智、製作總監葉成昌和高級編審許燕紅接受本刊訪問時,呼籲王征向六百多名亞視員工交代。

有尊嚴地離職

不獲續牌,員工想盡快有個

了斷。

「知道不獲續牌嗰日,大家都搭晒膊頭流晒眼淚,其實大家唔係等奇跡,只係想有尊嚴咁消失,而唔係俾人嫌棄咁去死!我哋會好好咁完成手頭工作,呢個係我哋俾番自己嘅尊嚴。」許燕紅哽咽說。

「坊間成日話亞視唔知做緊乜,平心而論,我哋喺有限資源,都做到啲節目俾大家睇,已經盡晒力。」袁潔儀說。

在亞視已經二十年的蔡國威說:「我哋冇糧出都繼續堅守,市民覺得我哋係奴才、蠢才,誤解我哋,其實我哋係履行合約精神,亦要為同事着想。我之前喊,唔係覺得冇咗份工會死,而係傷心難過,因為一個人,令六百幾個咁專業嘅同事冇咗份工,又被人話係垃圾,我戥大家唔抵!我份約八月三十一號就完,到時我可能唔做娛樂圈!」

3月 31日亞視發表聲明,確認控股權將轉讓予港視後,龜縮的王征與葉家寶(右一)在港鐵九龍站的港景匯服務式住宅,商談數小時。

鮑起靜為亞視不獲續牌傷心落淚,為員工不值。

蔡國威表示日後未必會做娛樂圈,考慮在內地開健身院。

早前亞視藝員百萬行都不忘給自己打氣。

亞視向無綫賣資產撲水出糧,近日有無綫貨車出入亞視。

積陰德勿拖遣散費

「就算做唔到一年,咁呢四個月做啲乜呢?我哋要知點安排。勞工處話處理遣散最快都要九個月,拖人哋遣散費係咪一個好嘅做法?既然諗住唔做,要賣資產套現,不如唔使我哋按照勞工法例排隊,搞到班同事咁辛苦,喺呢刻佢係咪要積番啲陰德先。」葉成昌說。

遭公司拖糧已久,亞視員工慣了自嘲。「有次同 BoBo姐(馮寶寶)見面,佢第一句就問我哋出咗糧未,就好似問你食咗飯未。」許燕紅說。

政府否決續牌當日,王征發聲明話係香港最黑暗一天。但員工卻唱反調,亞視助理副總裁冼偉智說:「佢咁講我好意外,唔係香港,係亞視最黑暗一天,關香港咩事。」

葉成昌直指王征管理下的亞視是最黑暗年代,「黑暗在於佢唔俾資源,就算俾都只係做佢自己鍾意嘅嘢。好似《香港有飯開》,收視由兩點打到七點,但佢唔鍾意就唔俾做。」

「處理藝人都係一個問題。藝人係電視台最大資產,睇住公司由幾百藝人減到得番六七十個;老闆搵啲廣東話唔正嘅新人入嚟做, under騷後又要消騷;咁嘅要求我做唔出,佢就俾第二個管,結果咪乜人都走晒。」冼偉智說。

亞洲會公器私用

日前亞視執行董事葉家寶與亞洲會二十多名代表「包圍政總」,要求政府批准亞視續牌,但亞視員工反應冷淡。

「當初成立呢個會我相信動機係善意,後來搞啲活動成為笑柄,公司秘書(杜辰)係亞洲會主管,仲要調動公司人手去處理個會多到做唔晒嘅業務,亞視員工返工唔係做亞視常務工作,坦白講,有冇俾人利用,我有疑問。」對冼偉智的說法,葉成昌更直言:「慢慢已經變咗某啲人嘅工具啦。」

雖然亞視告急,但王征與亞洲會在危亂之時仍有心情開派對狂歡。

早前亞視搞籌款活動,義賣籌款應急。

《百萬富翁》是亞視大受歡迎的節目。

蕭定一向亞視購入父親蕭若元有份製作的《天蠶變》。

遺臭

1957年成立至今,橫跨半個世紀的基業,亞洲電視終在王征手上走向末路。「亡國之君」在位五年,令亞視遺臭萬年。

流出維基密語

亞視在愚人節被政府釘牌,罪魁禍首王征發聲明稱是「香港黑暗的一天」,之後又「流出」他與王維基微信對話,內容顯示 3月尾時王維基曾主動約王征見面。

亂發布消息

死期將至,亞視新聞獨家報導,單方面宣布亞視控股權將轉讓給王維基的港視。翌日王維基發聲明澄清否認。

爆完響口唔認

王征接受內地傳媒訪問時說:「如果沒有奇跡發生,下月亞視就不存在。」但講完又唔認,事後被內地傳媒將訪問放上網,證明無作假。

後宮「佳麗」任揀

星光幫出身的梁景煌爆,指他與王征在深圳會面時遭他上下其手。之後再被爆與亞洲先生王暢一齊遊船河歡聚。盛傳指定重辦「亞生」選舉的王征,醉翁之意不在此。

拖糧繼續豪使

去年 8月被揭已停止注資入亞視,之後王征以一句完成歷史任務,繼續拖員工糧,自己就豪玩豪使歎世界。

強制洗腦班

強制藝員參加演藝訓練課,查實係洗腦班。不肯就範的戚黛黛,更被公司炒魷。

公器私用

在《微播天下》加入新環節「維基解密」,數臭爭取發牌的王維基,公器私用。

率藝員跳馬舞

為阻政府發新免費電視牌,王征親率藝員(男藝人為主)陪他在政總跳馬舞,並大罵不值他所為的毛孟靜,從此為亞視定下騎呢形象。

自創空櫈掟包

無厘頭在北京搞台慶,悶騷未完已嚇走觀眾,之後上演史冇前例嘅騎呢環節,率眾藝員向空櫈掟壽包。

鍾意就快D Share啦!
Related Posts Plugin for WordPress, Blogger...