探熱針
人剝佢剝 出股惑搶戲 56歲林敏驄爆肚剝褲
張家輝剝衫操肌做影帝，艾威全裸搵錢養家；偶然會為電影客串一角的音樂人林敏驄，在新片《全力扣殺》中亦加入剝衫男行列，年過半百，「全力賣股」，成功搶咗主角鄭伊健、鄭中基唔少風頭。
諗計雪前恥
五十六歲的林敏驄，去年在《男人唔可以窮》與黃宗澤三分鐘對手戲全被剪走，僅在出字幕時有「特別鳴謝林敏驄」七個字。
唔想俾人剪走拍完得個吉，在新片《全力扣殺》中，林敏驄落重料霸位。有一幕鄭伊健、何超儀、劉浩龍及邵音音圍埋打邊爐講波經，林敏驄失驚無神企上枱爆肚除褲晒股，仲要任由滾住的牛腩湯底鍋，蒸熏籮柚。
冷不防林敏驄出「股惑」，鄭伊健、何超儀及劉浩龍等即時四散爆笑，連食過夜粥的老手邵音音，被迫兜口兜面「賞月」，嚇到嘩一聲彈開，驚魂甫定，見導演郭子健冇嗌 cut機，大家唯有忍住笑， take埋個尾。
現場唯一不亂的，是預咗林敏驄會玩嘢的導演，和毫無反應，揸穩部機繼續拍的攝影師。
唔睇唔知，林敏驄個股竟然又白又滑。年過半百，晒股搏出位的他說：「導演好衰，唔俾我著底褲。拍嗰陣天氣好凍，個個用晒暖包，我為咗取暖，咪企上張枱用蒸氣暖吓囉。點知又真係幾暖，咪除褲暖埋個 pat。（冇辣親個股咩？）冇，牛腩 mask，正呀！」
邵音音讚靚
難為同場演員，硬食！「個個真係嚇到嘩嘩叫！唔好話佢哋，自己都驚，驚跌啲唔應該嘅嘢出嚟落啲牛腩度，唔知仲食唔食好。」林敏驄解釋，對正音音姐除褲，其實一片苦心。「佢話食唔飽，我咪加餸俾佢，佢睇完開胃到連湯都飲埋。」
之後會否進一步將底線調低，為出位繼續性感，林敏驄說：「今次只係開始，我嘅終極底線就係對手全裸，我就好似唐僧咁，坐懷不亂睇嘢。」
之後，搞笑林敏驄忽然正經多謝導演郭子健。「做演員好難控制，你做完場戲用唔用，剪唔剪；但睇到導演係俾位我做，多謝佢雪中送炭。」林敏驄說。
音音姐爆：佢個 pat辣到紅晒
至於被迫「賞月」的邵音音，事後指林敏驄玩爆肚出事。
「佢突然除褲，導演笑到唔記得嗌 cut，阿驄拎個 pat pat嚟打邊爐，拍完成個辣到紅晒，個個笑到碌地。（佢話專登益你！）咁又真係估唔到，佢個 pat好白，好靚喎！」邵音音說。
待價而「股」
過往有唔少影圈一線阿哥，包括梁家輝、成龍、梁朝偉和甄子丹等，也曾在電影露股吸睛，橋唔怕舊，晒股出位，陸續有來，更加無分男女，一點點勇氣，搏多多版位，值得。
莊思敏
早前以露肉唔露點拍全裸海報，宣布續約中國數碼三 D娛樂，大騷四十三吋長腿和圓潤靚股，搶版位搶人氣。
|
鍾意就快D Share啦！
|
|
|
