劈友場面，余文樂駕輕就熟，加上張家輝的清晰指示，不夠半日已經拍完。
探熱針
省招牌 余文樂幫拖 張家輝嚟真
去年首次執導《盂蘭神功》，電影票房雖然過千萬，但張家輝自知水準仍需改善，今年再拍鬼片《陀地驅魔人》，報一箭之仇。上週三（四月一日），張家輝搵來一齊合作新片《赤道》的余文樂落場客串拍劈友場面，但影帝導演要求高，要一鏡直落，還親自埋位同武師度位，點知俾對方吓吓踢中心口，嚇親余文樂！
心口中腳
當日，劇組拉隊到人較少的九龍塘學校區拍劈友戲，影帝導演張家輝唔使埋位，光住頭戴住超，同工作人員研究 set機擺位；之後一聲 action，幾名臨時演員，隨即衝上前襲擊余文樂等人。拍完第一 take，余文樂第一時間走埋去睇 playback，張導對住小電視指指點點俾意見，之後又行去同武師講解要求，身上無任何安全護墊的張家輝，忽然要求同對方試位：「當 roll機咁做！」
導演有令，豈敢不從！武師先起勢一刀劈頭，再一腳伸中影帝心口，捱咗一腳的張家輝冇詐型，還示意對方做得正確，跟住拉余文樂行近睇他再親自示範多一次；點知今次武師起腳踢得更狠，張家輝失去重心，整個人向後跌，幸得亞生黃集鋒及其他工作人員及時扶實，張導才不致滾地葫蘆。
最後，一鏡直落的劈友場面四 take拍完。
「導演（張家輝）好知自己想要乜，由 set機擺位到燈光，都好 firm咁話到俾我哋聽點做，要求都幾高㗎，有時都未必做到佢想要嘅要求。」《陀地驅魔人》幕後人員透露。
古仔全力撐
去年張家輝首執導演筒拍《盂蘭神功》，在影帝效應下，票房雖然過千萬，但口碑一般，張家輝上月底出席「香港影視娛樂博覽」時說：「我喺邊度跌低，就喺邊度起身，今次再拍鬼片，希望可以挽回聲譽；今次製作費好高，所以我都唔敢要片酬，如果拍到超支，我分分鐘要自己俾番錢出嚟埋尾！」
影帝片酬千二萬起跳，就算今次有古天樂的「 One Cool」包起《陀》片的投資，張家輝寧願將啲資源放喺製作，省番靚個導演招牌，啱數！
|
鍾意就快D Share啦！
|
|
|
