妖男大震盪 [壹週刊 - 1309] M1,

偽娘風在香港興起。

編輯室手記

妖男大震盪

日本宅男溝唔到女，於是過界扮女人自我滿足，呢股「偽娘風」開始喺香港興起，男人老狗，扮到性感美少女咁樣，有網民稱佢哋做妖男。呢個專題一開始，我哋就先入為主，認為妖男都係有同性戀傾向，為了啱頻道，於是由 Phoebe一組女記者接手，希望大家盡訴女人情啦，套多啲心聲。

在妖男身上掛上鏡頭拍攝，結果真是全街途人都望實。

點知女記者 Cherry訪問完一返來，就媽媽叉叉，話呢班妖男當中，有部分一啲都唔「女」，仲好鬼鹹濕，扮女人只係想增加自己嘅性興奮，更不停分享自己點樣扮女人來自摸，達到性興奮。 Cherry聽完覺得好核突，特別係有一個扮成美少女，但又鵝公喉嘅人，不斷印腳又走光，再同你講鹹濕嘢，真係心都震埋。

Phoebe聽見咁，腦袋也大震盪，話咁鍾意玩，玩大佢吖笨。於是一改以前採訪拍片作風，將部 cam掛喺妖男身上，然後叫妖男實際去深水埗街頭行一轉，以主觀鏡頭角度觀察，睇吓途人有冇被妖男吸引，色迷迷兼眼甘甘咁睇。試完返來，同事問：「有冇人𥄫呀？」 Phoebe笑答：「有呀，仲有人想打佢。」

妖男身穿內衣，擺出

多個嫵媚甫士。

Phoebe又繼續腦震盪度新橋，希望將妖男整個變身過程拍下來，然後用快鏡半分鐘播晒佢，雖然最後效果唔係咁理想，但大家已經由過往文字採訪和影片拍攝嘅同一角度，改變成文章有文章角度，影片就另外度影片角度，一個古仔兩種玩法，一雞兩味甚至四味。

同組一男編輯聽聞唔少妖男扮起來都好靚女，於是又仗義幫忙，不停在網上約其他妖男出來見面，點知積極過頭，有妖男忽然問該編輯：「你其實係咪想搞我？」搞到成組人幾乎笑到碌地。

我哋成日都強調，呢個世界冇悶嘅古仔，只有悶嘅記者，當記者採訪時投入又做得開心，出來嘅古仔就一定好睇，讀者同我哋一齊過到癮，咪就係好古仔。（麥景慶）

鍾意就快D Share啦！

下一篇 》