2015年4月9日 星期四

獨家圖片 朱麗倩生日抱女上京 劉華最靚 B曝光 [壹週刊 - 1309] 朱麗倩,劉德華,劉華,M1,



密冚三年, Hanna真面目終於曝光,眼大、嘴細、鼻高,結合父母優良血統。

娛頭

獨家圖片 朱麗倩生日抱女上京 劉華最靚 B曝光

為密封私生活,早年劉華耗資二億買入加多利山獨立屋,再花千萬裝修改建成滴水不入安全堡壘,無非想保護囡囡劉向蕙( Hanna),避免寶貝女曝光。

天王女轉眼三歲,即將要入讀 K1,唔能夠一世避開人群,老豆劉華開始轉口風,計劃安排公開 Hanna真面目。

身在北京的劉華,趁朱麗倩四十九歲生日,上週安排兩母女速遞到北京,一齊為老婆慶祝生日。天王女出巡,有助手、兩保鑣、兩工人組成五人護 B團,但可愛的 Hanna,不停穿梭人群之間,十分活潑。身穿牛仔恤衫加白色 legging的她,眼仔碌碌、鼻高高嘴細細,集父母優點,絕世靚 B,收埋三年,終於曝光!

北京家庭樂

去年在「華仔天地」的聚會中,對住稱呼做「家人」的粉絲,劉華大開金口讚囡囡:「愈大愈似媽咪……點睇都係一個靚女……等佢大啲啦,三歲就係時候帶俾大家見吓!」

劉華並非得把口,他的確有晒計劃,安排愛女 Hanna見人。

「其實華仔預咗等個女三歲,就會公開俾大家見,佢平時都好鍾意同身邊朋友甚至 fans分享囡囡嘅近照,仲會提醒睇過囡囡啲相嘅人,如果喺街度見到,叫佢 Hanna好嘞,唔好大叫劉德華個女呀,佢咁緊張,都係想個女有個平凡、安全嘅童年,但佢係有打算嚟緊九月帶埋囡囡去歌迷聚會,俾佢啲『家人』見吓。」劉華身邊人透露。

正在北京趕拍張藝謀荷李活新戲《長城》的劉華,原本一早同劇組攞定假,飛返香港慶祝老婆朱麗倩今個月六日四十九歲生日,但因拍攝比原定時間落後了不少,劉華於是自動提出銷假,改安排兩母女飛上北京。

「每年老婆生日,劉華幾忙都會陪朱麗倩,有咗個女之後,大時大節更加一家三口過,反正放緊復活節假,佢都想個女出去玩,咪索性叫兩母女上北京囉。」

其間 Hanna顯得非常好奇,不停眼仔碌碌四圍望。

兒童節當日,朱麗倩同 Hanna在五人護駕下漫遊北京市朝陽公園,朱麗倩全程親手抱女,又走埋人群堆中睇撈金魚。

朱麗倩細心幫囡囡整理頭髮。



朱麗倩不停手指指,同 Hanna講解公園

環境。

沿途助手不斷用手機替 Hanna拍照。

見到飛機興奮

上週四(四月二日)早上,北京慶生團準備出發,兩名保鑣先在離境大堂巡邏,助手則負責幫忙辦理登機手續,並將十多個大喼、一廂尿片安排寄艙。約半小時後,戴住口罩的朱麗倩終於現身,身旁還有兩名外傭,其中一人負責抱住囡囡。五月九日便滿三歲的 Hanna,長得非常精靈,去到機場不停八卦四圍望,眼大、嘴細、鼻高,精緻五官盡得父母真傳。

由兩保鑣、兩工人及助手組成的五人護 B團,沿途保護兩母女,一行人乘坐無人駕駛列車前往閘口準備登機,其間 Hanna要落地自己行,只見她一手拖住媽咪,另一隻手拖住外傭姐姐,興奮得扎扎跳,又不停同媽咪傾偈。去到閘口,見到大窗外的飛機, Hanna更加興奮,指住不停大叫:「飛機呀!飛機……!」 Hanna仲邊跑邊說:「去搵 daddy」非常得意。

到夠鐘開閘讓乘客登機,四周開始聚集人群,五人護 B團以人牆方式包圍住 Hanna,但小朋友愛四處跑, Hanna不時搵機會衝出人牆,要保鑣叔叔像麻鷹捉雞仔般,將她拉回來。

終於到達北京,朱麗倩帶住囡囡行 VIP通道離開機場,兩名保鑣負責攞行李,一行人返回下榻的酒店後,未有再外出。

上週四(二日),朱麗倩帶埋囡囡出發到北京,會合劉華慶祝四十九歲生日。



身穿牛仔恤衫配白色 leggings的 Hanna扎扎跳,非常可愛。

到達北京,朱麗倩與 Hanna從 VIP通道入境,同行保鑣則負責拎行李。

夠鐘上機,心情興奮的 Hanna突然奔跑大叫:「去搵 daddy」

一行七人共十個大喼加一箱加大碼尿片,包了廿四座 van仔到達酒店。

漫遊公園

劉華正在北京趕拍張藝謀執導的荷李活片《長城》,因拍攝延誤,唯有安排妻女飛北京會合,慶祝老婆生日。

上週六(四日)兒童節,大部分時間留守酒店的朱麗倩母女終於出動,下午三點,一行七人分別乘坐兩架七人車離開,先到位於使館區的超級市場買日用品,之後便直駛去朝陽公園。當日著住紅色羽絨、牛仔褲加波鞋的 Hanna,全程由媽咪抱住,非常乖巧,完全冇扭計。眾人租了一架電動車在公園內巡遊,沿途朱麗倩不停周圍指,同囡囡講解, Hanna亦配合地兩頭望,其間,朱麗倩幫囡囡撥好頭髮,又叫助手拎相機替兩母女拍照,好溫馨。

遊完車河,朱麗倩抱住 Hanna行埋人群堆睇撈金魚,好奇的 Hanna將頭愈哄愈埋,朱麗倩亦罕有露出開懷笑容。眾人在公園逗留了個多小時,便返回酒店休息。

停工陪女

曾經表示唔捨得將囡囡送去外國讀書的劉華,一直希望 Hanna可以入讀傳統學校,「我想去接放學,如果你哋嘅小朋友同我個女同一間學校,希望你哋用正常眼光睇佢。」

九月便讀 K1的 Hanna,近月已開始到各大幼稚園面試。據知作風一向平民化的朱麗倩,棄學費高昂的國際學校,心儀近加多利山屋企、位於九龍塘的創價幼稚園。去年十月,廿四孝爸爸劉華更親自出動,同老婆囡囡一家三口齊齊到幼稚園面試。有目擊的家長透露,當日劉華非常緊張,全程拖到囡囡實一實。

「囡囡九月升 K1,華仔想多啲時間陪佢適應學校生活,原本準備開誇年騷都決定唔開,將啲工作盡量安排上半年做完,下半年專注陪 Hanna。」劉華身邊人透露。

一向將私生活密封的劉華,在囡囡出世及一歲生日時,亦只公開一家三口手牽手及蛋糕相。

去年十月,有家長目擊劉華親自拖住囡囡到位於九龍塘的創價幼稚園面試,該校出名平民化,劉小慧及蘇志威的細女亦是該校學生。

護女大陣仗

為保護家人,劉華多年來想盡辦法,搬屋換保鑣換車,招數層出不窮。

遮陣擋記者

寶貝女劉向蕙出世兩個月,要到中環診所打預防針,劉華高度戒備,安排四名保鑣護駕,再吩咐大廈保安組成「遮牆」,甚至要求診所清場,全面阻擋記者鏡頭,以防愛女容貌曝光。

十大靚 B

劉華女五官精緻得人鍾意,其實唔少圈中星二代,亦盡得父母的優良基因,長大後隨時有機會做明日之星。

吳彥祖、 Lisa S.

媽咪是中、猶太、法國混血兒,加埋爹哋俊朗五官, B女吳斐然( Raven)生得精靈又可愛,絕對係圈中混血靚 B之首。

謝霆鋒、張栢芝

被喻為郎才女貌的謝霆鋒、張栢芝,生出來的寶貝仔當然有番咁上下,大仔 Lucas及細仔 Quintus兩個愈大愈靚仔,加上有潮媽悉心打扮,無得輸。

張智霖、袁詠儀

以前會將寶貝仔魔童張慕童收收埋埋的靚靚,近年唔再介意俾囝囝曝光,一對大眼睛似足媽咪,面形則似 Chilam,絕對有資格做迷你 Cool魔。

吳鎮宇、王麗萍

去年,吳鎮宇兒子 Feynman於內地節目《爸爸去哪兒 2》首度亮相,可愛的 Feynman又酷又帥,迷倒不少觀眾,加上生鬼表情, fans分分鐘多過老豆。

李嘉欣、許晉亨

大美人李嘉欣與許晉亨的愛情結晶品許建彤(小 JM),大眼睛兼雙眼皮似足媽咪,而五官則似爸爸,俊!

郭羨妮、朱少杰

12年,郭羨妮誕下女兒 Kylie,似足媽咪的她,愈大愈靚。

朱茵、黃貫中

12年升呢做爸爸的 Paul,以「叉燒包」來形容愛女黃鶯,雖然似爸爸單眼皮,但樣子相當甜。

甘比、劉鑾雄

08年出世的劉秀樺( Josephine),似足媽咪,甚得爸爸歡心。

盧淑儀、李克勤

李克勤與盧淑儀育有兩子,大仔李立仁( Ryan)長得黑黑實實,鼻子挺直,加上天生大額頭,樣子與童年的克勤十足餅印。

加多利山起堡壘

09年,劉華不惜豪擲 2億買入加多利山獨立屋,再耗資千萬施工三年,將三千呎地方打造成囡囡的歡樂天地,小 Hanna有充裕空間活動之餘,更是滴水不入的安全屋。

搬竇鎖𨋢

由於加多利山愛巢被揭,劉華一度舉家搬到月租 17萬的尖沙咀服務式住宅暫住,更享有特權,出入有專人負責鎖𨋢,避免與閒雜人等同𨋢。

冇永遠秘密

劉華攞正牌娶老婆生女,一直秘秘密密,但娛圈無論多大的秘密,總有曝光之日。

成龍

82年,成龍與林鳳嬌秘密結婚,同年誕下兒子房祖名,多年來兩母子一直收收埋埋,直至 98年成龍契爺何冠昌去世,成龍在訃聞上才以誼媳及誼孫公開林鳳嬌及房祖名母子身份。

譚詠麟

家有髮妻莎莉楊潔薇的阿倫,一直避談紅顏知己朱詠婷及兒子譚曉風,直至 06年阿倫父親去世,為遵從父親遺願,才公開兩母子的身份。

(《蘋果日報》圖片)

曾志偉

經歷兩段婚姻的曾志偉,多年來甚少公開家庭事,與第一任妻子王美華誕下大女曾寶儀後,樣貌及身份一直未有曝光,其後曾寶儀加入電視台做幕後,亦一直保密父親身份,直至她轉戰幕前做主持,志偉為助女兒事業,才大方公開父女關係。

鍾意就快D Share啦!
Related Posts Plugin for WordPress, Blogger...