探熱針
不和升級 楊秀惠葉翠翠有你冇我
有份主持節目《姊妹淘》的楊秀惠早前被踢爆扮阿姐，對合作的莊思敏、吳若希及葉翠翠恰得就恰，目中無人！惡行曝光，節目監製好言相勸，楊秀惠亦一度收斂，嘗試同三個拍檔扮 friend。但本性難移，更將行動升級，集中火力，對付葉翠翠。
楊秀惠認為葉翠翠刻意與吳若希聯手，於是刻意擺姿態玩針對，除了拒跟大隊同對方食生日飯，又頻向導演狂插葉翠翠唔跟稿，自把自為；工作人員為求息事寧人，唯有一刀切！避免安排兩女同場，火遮眼！
拒俾面缺席生日飯
人緣十分麻麻的楊秀惠，主持 J2節目《姊妹淘》接近三年，跟莊思敏、葉翠翠和吳若希近乎日日見，但彼此關係卻愈來愈勢成水火。
「楊秀惠唔妥啲拍檔單新聞出街後，監製有提過佢，勸佢唔好咁執着，嗰段時間佢扮好人，仲喺微博公開多謝葉翠翠買嘢俾佢飲。但佢其實口不對心，葉翠翠九月十號生日，大家吹雞同壽星食飯慶祝，楊秀惠都冇去。表面上同人扮 friend，其實私下又喺導演面前插葉翠翠爆肚唔跟稿，怪人哋搞到成個 flow唔順。其實導演都覺得冇問題，但大家免煩，盡可能唔安排佢兩個同場，葉翠翠話咁仲安樂晒。」工作人員說。
幫吳若希惹誤會
成為楊秀惠頭號對頭人，有指因為葉翠翠撐拍檔吳若希，令對方覺得二人聯手對付自己。
「楊秀惠鍾意恰新人，張名雅做主持嗰陣，佢成日喺背後話人哋蠢、夢遊；之後換咗吳若希，佢都係咁彈，有時葉翠翠會睇唔過眼，幫吳若希兜，又會响同事面前撐佢乖，楊秀惠咪覺得佢哋聯手囉！」
楊秀惠犯眾憎，另一主持莊思敏為免捲入是非，開工亦寧願與工作人員為伍。
「雖然莊思敏係《姊妹淘》第一代主持，但始終唔係無綫人，楊秀惠都睇佢唔順眼，投訴話佢搶對白，監製冇理仲教訓咗佢一輪，雖然自此之後楊秀惠就唔敢亂搞人，但莊思敏冇特別理佢，做完嘢就走。」工作人員說。
|
鍾意就快D Share啦！
|
|
|