最新圖片
細佬 Quintus出世未幾父母便婚變，他與父親相處時間比哥哥更少。
娛頭
借醫腳翻閹王菲 失約唔探仔 霆鋒兇栢芝減贍養費
上星期六（九月二十日），突然爆出「鋒菲」世紀復合消息，謝霆鋒被發現留宿王菲位於北京東三環亮馬橋外交公寓的新竇，兩人足不出戶四日三夜， chok鋒更在廚房窗前真人示範和情人深深一吻來代替講話。
神奇復合，成為全城熱話，當中向華強太太陳嵐，則在微博唱反調：「原本鋒菲舊情復燃不關我的事。但是……突然覺得張栢芝母子三人好可憐。」
曾經是中國星人的張栢芝，與向太關係千絲萬縷，據了解，向太得知謝霆鋒原本答應上個禮拜飛新加坡探仔，到頭來卻人在北京跟王菲日夜痴纏，加上離婚後對兩子並不關心，甚至試過提出減贍養費，想到栢芝其實是個得把聲的紙老虎，向太決定出面幫拖。
向太最清楚
「鋒菲」世紀復合，謝霆鋒再次因為感情事成為頭版人物，而前妻張栢芝，亦被發現在雲南工作期間，因急性腸胃炎入院，瘦得雙手青筋曝現。
被指千方百計挽救婚姻的張栢芝，對有關「鋒菲再戀」，外界一致估計她會大受打擊，與此同時，中國星老闆娘向太亦踢爆張栢芝跟她通電話時喊爆，向太還在微博留言：「突然覺得張栢芝母子三人好可憐。」因為她知道謝霆鋒沒有做好父親本分。
「講真，阿女（指栢芝）一早對呢個男人已經死心，呢樣嘢冇得呃，以前佢一提起個男人就喊，而家就算喊，都只會係個老豆唔肯見仔，阿女𤷪起上嚟激到喊，話晒當日離婚，講好咗無論如何都唔可以影響小朋友，阿仔（指謝霆鋒）亦應承會抽多啲時間陪兩個仔，但到頭來得個講字，呢啲嘢，向太都知道晒。」知情人說。
見仔變瘟菲
據知，上週謝霆鋒原本答應會飛到新加坡探仔，到頭來卻在北京跟女友王菲對足四日三夜。
「當時阿女喺雲南山區拍緊江蘇衞視嘅《明星到我家》，突然收到阿仔電話問佢喺邊，話（九月）十九號去新加坡探仔；阿女話自己要開工，最快十九號先返到新加坡，阿仔聽見就係咁鬧：『你顧住做嘢得我唔使探個仔㗎』阿女都懶得都佢拗，但就答應一定會盡早收工飛返去安排。
「點知咁唔好彩，阿女十四號晚急性腸胃炎又屙又嘔，但當地啲醫院衞生環境太恐怖，阿女住咗兩晚醫院，最後都頂唔順，返香港入咗山頂間明德留醫，大家叫佢休息多幾日，但佢堅持十九號之前要返新加坡，話個老豆難得肯見仔，唔想小朋友失望。」知情人說。
當張栢芝如期返到新加坡安排好一切，謝霆鋒卻忽然人間蒸發。由於已非第一次，栢芝亦不以為然，直到星期日（二十一日）睇到「鋒菲」復合被廣泛報導，知道前夫為了王菲，寧願放兩個仔飛機，加上向太越洋來電問候，栢芝忍不住爆喊。
兒子前鬧前妻
Lucas和 Quintus兩兄弟早前放暑假，栢芝帶兩子返香港同父親見面，但謝霆鋒卻責怪前妻疏忽照顧兩個仔。
「佢兩個一見面，十次有十次都鬧交，阿仔有時就算响兩個小朋友面前都照鬧。之前暑假三父子喺香港見面，佢又大大聲鬧阿女究竟點湊仔？點解兩個奀挑鬼命？點解 Quintus到而家都唔識自己食飯沖涼。大佬呀！ Quintus得嗰四歲，要媽咪幫佢沖涼去廁所有咩出奇，阿仔又成日話要攞番對仔，佢明知兩個仔係阿女命根，係要搞到佢喊晒先安樂。
「其實話要攞番兩個仔，無非係唔想俾贍養費。之前阿仔個律師提出呢個要求，但阿女嗰邊企硬，講真，我哋作為朋友，唔方便過問佢兩個錢銀上嘅事，但外面啲人講到阿仔又俾晒家用又送新加坡豪宅，根本買樓啲錢全部係阿女自己俾。阿女份人唔鍾意解釋，對仔有時都怕咗個老豆，反而拉姑飛去新加坡探孫，兩個細嘅仲開心，其實阿女從來冇講過唔俾謝家嘅人探 Lucas同 Quintus。」知情人說。
借痛腳翻兜
跟前妻關係愈趨惡劣，謝霆鋒現下最着眼的，是如何捉緊王菲。
「霆鋒今次真係精心部署，佢之前放晒風俾阿菲身邊人知，話自己右腳舊患復發，想喺北京睇醫生，件事好快傳到阿菲耳中，佢條腰骨有事，自己喺北京睇開個醫生都好好，所以就推薦俾霆鋒，就係咁，兩個開始聯絡。今年三月，趙薇借法國酒莊拍《 12道鋒味》，都係想撮合鋒菲，佢仲喺節目暗示阿菲冇愛錯呢個男人，趙薇幫手撥到行，但當時只係試探吓嘅曖昧期，真正喺埋一齊，都係呢個月嘅事，估唔到咁快就俾記者影晒相。」
據了解，「鋒菲」復合，張栢芝亦一早收到風。
「呢個圈有幾大，要知道唔難。不過阿女並唔係外界眼中講到咁放唔低，佢只係心痛對仔冇父愛，自己都係單親家庭長大，兩公婆緣盡，控制唔到，佢只係希望無論大人發生咩事，唔好影響對細路啫！」知情人說。
天后最愛花心男
96年與第一任丈夫竇唯結婚，並誕下女兒竇靖童，女尊男卑的婚姻只維持了三年就玩完，原因除了竇唯高調「偷食」高原，又公開指王菲跟他一起是「陰謀」，最終令天后徹底心死。單身一年後，王菲與謝霆鋒在人前上演「世紀一拖」，公開相距十一年的姊弟戀，其間因張栢芝介入一度畫上句號。
花心男愛完一個又一個，王菲仍未有吸取教訓， 04年與緋聞多籮籮的李亞鵬拍拖，二人翌年於烏魯木齊結婚，到去年 9月，王菲突然在微博宣布與李亞鵬夫妻情已盡，兩人的女兒李嫣跟父親生活，卸下天后的男人包袱，李亞鵬隨即被發現攬女啜爆兼過夜，女伴如走馬燈。
十一年後還是你
相差 11年的姊弟戀，相隔 11年再重逢，但外界對「鋒菲」戀睇法各異，更有算命師「抽水」指兩人年底前必定分手。
00年 6月 姊弟戀曝光
經歷與竇唯婚變一役，王菲與細自己 11年的謝霆鋒撻着，出席電影慶功宴離開時，王菲主動拖實謝霆鋒。
02年 1月 栢芝介入
栢芝在《慈善星輝仁濟夜》飛車籌款受傷入院，謝霆鋒連日探望，當時仍與王菲熱戀中的他，堅稱和栢芝是「兄妹情」。
02年 3月 鋒芝愛出禍
謝霆鋒因撞毀法拉利發生「頂包案」事件，有指當時在車廂內的張栢芝，意外後帶男方返自己家中避風頭，之後警方到張栢芝寓所拘捕謝霆鋒。其後二人再被拍到同遊泰國，戀情曝光，「鋒菲戀」亦隨之結束。
05年 7月 李亞鵬與王菲結婚
和謝霆鋒再分手，有指李亞鵬、黎明同時向王菲展開追求，最終由李亞鵬勝出，二人在烏魯木齊結婚，並誕下女兒李嫣。
06年 9月 菲島閃婚
謝霆鋒和張栢芝在杭州高調拖手，以行動宣布「再愛」；同年二人秘密在菲律賓閃婚，先後誕下兩子 Lucas和 Quintus。
11年 8月 栢芝宣布離婚
張栢芝在微博發聲明與謝霆鋒離婚，結束五年夫婦關係。
13年 9月 緣盡李亞鵬
王菲與李亞鵬在烏魯木齊簽字離婚，女兒李嫣跟老豆。
14年 9月 世紀復合
同樣回復單身的謝霆鋒、王菲，被拍到在北京寓所連環啜嘴，相隔 11年愛火重燃。
拋妻賤男
結婚簽字已經唔再係一生承諾，男人話變就變，拋妻棄子嗒小三，圈中大有人在。
周永恒
上月，爆出周永恒背妻偷食助手 Ruby，更向阿 Yu施以家暴，被判守行為 18個月，自稱人渣的周永恒人前扮悔改，人後卻繼續與小三外遊，逼阿 Yu盡快離婚，進身新一代世紀賤男。
|
鍾意就快D Share啦！
|
|
|