上週六早上九點，陳倩揚送仔到九龍塘返 play group，落車後，肥了十多磅的她依然身手敏捷，拖住囝囝沿路跑。
探熱針
被迫冚旗 陳倩揚頻撲搵生意
得到大台「特別體恤」，佗住第二胎的陳倩揚收公司 order，提早放產假，至於《東張西望》主播之位，無綫亦早有預謀，準備安插今年出爐港姐冠軍邵珮詩上位。
無端端多一個月假期，陳倩揚如常湊仔，又撲來撲去搵生意，一日走幾場。
送仔返學拉埋客
無綫為騰出位置，安排有後台的港姐冠軍邵珮詩做主持，要本來十二月才開始放產假的陳倩揚提早冚旗，公司有令，陳倩揚唯有配合。
上週六（十一月八日）早上，陳倩揚朝早九點便孖住老公由沙田住所出發，送囝囝羲廷到九龍塘返 playgroup，兩公婆在學校等了一粒鐘，再帶兒子到隔條街另一間學校學跳舞。
在跳舞學校碰到胡諾言老婆陳琪，要等放學的陳倩揚跟對方大講湊仔經外，甚至做埋 promoter，跟學校管理層推介她老公做顧問的新科技冷氣清潔公司。
「其實好多朋友都有幫襯佢老公間公司洗冷氣，好似胡諾言、宋熙年同麥雅緻都係佢客仔，因為呢套技術好新又環保，比一般洗冷氣方法快同衞生，好啱有小朋友嘅家庭；學校亦係推介對象，倩揚計劃接學校啲冷氣嚟做，傾到係大生意。」知情者說。
生 B前開檔搞美容
上完跳舞堂，已經接近中午十二點，陳倩揚兩公婆送兒子返屋企後，換過另一套衫再出動到新蒲崗再傾生意。
「倩揚一向路數多，佢諗住生完再着手搞美容生意，但早咗成個月放假，咪索性同人傾埋個 project，佢話趕到 BB出世前搞掂就最理想。雖然七個幾月，但佢坐唔定，有時一日走幾場，連慈善騷主持都撈埋。」身邊朋友說。
「體恤」陳倩揚要她提早放產假事件被踢爆後，無綫日前急煞停邵珮詩做《東張西望》主持計劃，寧願改由其他主持踩多更硬頂，扮無事發生，以免落人口實。
穿煲縮一縮
按照過往，《東張西望》的主持人如麥雅緻和張慧慈懷孕，都是產前一個月才放產假，即使陳倩揚， 11年佗第一胎時，一樣是大着肚開工，到產前一個月才開始放假，今次無綫對陳倩揚作出特別安排，無非為空出主持位，讓邵珮詩加入《東張西望》，被剝去羊皮西裝，大台奸計，暫不得逞。
|
鍾意就快D Share啦！
|
|
|