盧偉聰九七年八月曾偵破一宗電梯連環劫案，向傳媒展示證據。
八卦陣
新任一哥二哥 made in觀塘差館
盧偉聰星期一終於坐正，接替曾偉雄做警務處長。新一哥大學畢業後加入警隊，首先被派駐觀塘警署。觀塘差館可能風水好，有利事業，同期喺嗰度工作嘅周國良同張德強，全部官運亨通。周國良啱啱升任警隊第二把交椅，做副處長（管理），佢係紅褲仔出身，由警員升到去做二哥，證明功夫紮實。張德強亦係大學畢業後入行，依家做到助理處長（行動）。
曾經喺觀塘差館工作嘅一位老前輩話，盧偉聰八四年去觀塘就加入重案組，經常要跟啲棘手嘢，所以訓練到佢為人較為謹慎。呢位 CID Man後來借調國際刑警工作，返港後曾任職保安處。可能基於工作性質，新一哥形容自己以前較低調，但佢話以後會改變作風。
盧偉聰接咗禿鷹個位，同時接手一個爛攤子，包括佔中期間七警打人事件、多名記者採訪被打傷，臨尾仲多一劑警隊用二千七百萬買三架水炮車，新一哥應該冇乜蜜月期，即時要披甲上陣。
689訪美要睇幹細胞
梁班子呢期落區推銷政改，個個都俾市民噴到一面屁。梁振英就出走波士頓，名義上慶祝國泰開通波士頓直航機，但行程包括咗參觀埋麻省理工學院媒體實驗室同哈佛大學幹細胞研究所，難免令人有所猜想。
本刊之前曾報導，劉鳴煒捐錢俾瑞典卡羅琳醫學院興建再生醫學中心，打理中心嘅係前哈佛教授錢肯。 689大仔梁傳昕嘅博士後研究，正正係跟錢肯嘅研究團隊。雖然呢趟係參觀哈佛唔係瑞典，但特首同埋創新及科技顧問楊偉雄專誠參觀幹細胞研究所，唔知係咪想喺香港搞番一個？
喺哈佛攞到博士學位嘅中國維權人士楊建利，本週一網上號召當地港人同學生，趁 689訪問研究所時到場示威，睇嚟佢去到邊都避唔到示威群眾。
港大學生會撇甩支記
支聯會本來邀請香港大學學生會五月四號一齊洗刷國殤之柱，承傳呢十幾年毋忘六四、爭取民主嘅傳統。不過今年學界本土派當道，現屆港大學生會上月廿九日「飛起」支聯會，自行洗刷國殤之柱，支聯會取消洗刷活動之餘，仲要大讚學生夠主動，都咪話唔硬食。
距離六四周年紀念仲有一個月，支聯會逢星期五都有關於「邁向可持續發展的中國」系列講座，中國時事評論員林和立十五號主講「習近平強勢領導下的危與機」；肯肯定返唔到大陸嘅佔中發起人陳健民，將會負責廿二號嘅「中國公民社會發展」。本月三十一日嘅「愛國民主大遊行」，由以往維園行去政府總部，改為灣仔修頓出發，行去西環中聯辦。支聯會中人話，除咗直接向中央表達平反六四訴求外，原來西港島線開通咗都係原因之一，起碼市民參加遊行示威都方便啲。
泛民落區 年輕國安監視
未來個半月係政改關鍵時刻，政府、保皇黨、泛民都要落區大打民意戰。本週日泛民組成車隊巡遊各處，仲喺旺角、深水埗、荃灣搞街站宣傳拒絕袋住先。
呢個時候維穩部隊又要出動，派出疑似國安嘅大陸人喺街站喪影泛民同記者，仲即刻發送相片、影片，勤力程度比佔領前有過之而無不及，唯一嘅分別係呢班國安比較後生，衣著都潮啲，起碼會著 tee同短褲，而唔係 Polo加西褲。
記者見佢哋全方位盯實泛民，於是問吓佢哋係咪嚟香港旅遊，其中一個後生女毫不避忌話係嚟「工作」，記者追問佢係進行緊咩工作，佢就拋低一句「在上面的……」就走咗去。
|
鍾意就快D Share啦！
|
|
|