（《蘋果日報》圖片）
探熱針
周子揚未見家長 何傲兒唔放林建名
同周子揚散完再復合，孖咇食飯、外遊首爾斷到正的何傲兒仍死口不認戀情，更加強調從未帶過男方返屋企見家長。努力撇清關係，無非怕得罪未斬纜的爺級男友林建名。
上週日（五月三日），林建名的愛驅「精靈大少」於沙田馬場出賽，近期忙於為新劇《波士早晨》開工的何傲兒，下午二時一副戰鬥格，傍實大少現身馬場，其間還貼心為對方準備豆腐花，再續爺孫戀。
要開工又要分身同周子揚拍拖，仲要唧時間服侍「爺爺」林建名，何傲兒好忙！
落到沙圈企開啲
週日沙田馬場賽事，林建名的馬匹「精靈大少」出賽第七場。下午一時午飯時間，何傲兒父親何世根傍實大少，現身馬場二樓，進入只招待會員的 JC Club準備食自助餐。一小時後，化行妝、踩住三吋高踭鞋的何傲兒單拖到，同林建名先打個招呼，再去攞嘢食。由於是會員專用地方，人流不多，何傲兒明顯放下戒心，不時同「爺爺」傾偈，更親自幫對方攞豆腐花做飯後甜品。
接近賽事舉行，食飽飽的林建名帶住女兒和何傲兒一家，落去沙圈同騎師打招呼。公眾地方企滿外人，何傲兒自動波彈開兩個身位，同林建名保持距離，雖然有美相伴，但「精靈大少」未能跑出，賽事後，何傲兒亦先行離開。
認「爺爺」做家人
在新劇《波士早晨》扮醜女的何傲兒，本週一（四日）下午三時，由父親護送到中環做 facial。
對於同林建名馬場短聚，何傲兒直認不諱：「係呀，尋日係 family day，我同 Daddy、佢（林建名）同屋企人。（怕唔怕周子揚唔高興？）如果啲人再 focus喺嗰啲（爺孫戀）都唔怕，我行得正企得正，唔怕人亂寫。我覺得外面啲人再信，簡直係傻豬豬囉！」
以 family形容與林建名關係，但對於多次拍拖被斷正的周子揚，何傲兒提都唔想提。
「我而家專注工作喎……（同周子揚嘅關係呢？）朋友囉……我覺得好多嘢都講緣分。」問她是否等緊周子揚，何傲兒馬上澄清：「唔係！我等緊 Daddy嚟車我。」
等候期間，見記者收起攝影器材，戒心下降的何傲兒自爆周子揚還未有機會見家長，「 Daddy只喺電視上見過佢！」
二人之間有個林建名，周子揚想光明正大做何傲兒男友，未係時候！
|
鍾意就快D Share啦！
|
|
|