原本預產期在六月中的洗米嫂，為怕洗米華會搵 Mandy過生日，於是諗了條「絕世好橋」，就係提早開刀生仔，要「小米」同老豆同日生日。
探熱針
惡鬥 Mandy 洗米嫂提早剖腹 「小米」同老豆同月同日生
Mandy Lieu同洗米嫂（陳慧玲）的「搶米戰」愈來愈激烈，一直沉默的 Mandy上星期五突然蒲頭 Instagram，上載一張火紅索爆泳衣照，立即惹來洗米嫂極大反應，連洗米仔（周柏豪）都加入戰團。
洗米嫂公開留言：「我有仔有女有家人，又豈可以輕言放手呢，我一直在努力維護和捍衞自己的家庭啊。」講得出做得到，為霸實老公周焯華生日正日，洗米嫂決定提早約兩星期開刀生 B，揀好老公五月三十日生日當天生仔，以 BB做籌碼，等周焯華以後每年牛一都要留守屋企，陪「小米」 BB一齊過生日，呢一招，夠晒絕。
大反應
近日每逢 Mandy Lieu有任何動作，或者有關她與男友周焯華的恩愛報導出街，都會觸動到洗米嫂神經，定必作出反擊，可惜一連串還拖行動似乎無甚效用。 Mandy的受寵，與日俱增。
為進一步鞏固防線，據知已經有七個多月的洗米嫂，決定出絕招。預產期在六月中的她，一早 book定養和醫院產房豪華套房，又搵風水師傅揀定六月中好日子生 B。但見老公周焯華無論幾忙，都抽時間陪 Mandy呢度去嗰度去，上個月更密集到去勻英國、法國、日本，洗米嫂就只有周焯華人在澳門期間，才有機會見到老公。
先斬後奏
輸人唔輸陣！據了解，洗米嫂已改變主意，在未有同老公商量下，迅速將醫院產房和醫生期全部提前到五月底，提早兩星期開刀生 B，刻意安排 BB可以和老豆同月同日，五月三十日生日。
「 Heidi（洗米嫂）自己都講過，總之每逢大時大節，老公識返屋企就得，佢亦知道嚟緊華哥（洗米華）生日正日，大家都會𥄫住究竟係同邊個過？佢擔心萬一華哥去咗 Mandy嗰邊，佢會輸晒好冇面，但如果揀喺嗰日生仔，華哥咁重親情，就一定會留喺 Heidi身邊，睇住 BB出世，仲有，之後每年華哥生日，都大條道理，要求個老公同 BB一齊慶祝，呢個辦法係唯一，亦係必贏嘅。」洗米嫂身邊人說。
不過，如果參考有四頭家的賭王何鴻燊做法，生日四房逐人去勻，洗米嫂未必如願。
網上開戰
上週五（ 1/5）， Mandy突然在個人 ig上載索爆泳衣照後，立即觸動洗米嫂神經，吹雞搵埋繼子周柏豪在 Mandy ig開火，展開連場罵戰。
2:45pm
Mandy在 Instagram罕有現身，上載火辣泳衣照並留言：「 You can't be me darling, so don't even bother… That's just pathetic.」（親愛的，你不能成為我，所以唔好做咁多嘢……只會顯得你可悲。）仲話自己嘅身形冇可能著到「 XXL」，話如果想打擊佢的話，就先做好自己先，句句有骨。
7:28pm
洗米華大仔周柏豪在 Mandy ig回覆：「 Darling, if you have anything you wanna imply, just straight out say it?」，叫佢有咩直接講，又話：「 btw… which body wear XXL? I would love to meet that body!!!」仲反問邊個要著加大碼？
7:41pm
轉頭洗米仔再喺個人 ig上載一家三口合照，三人手指擺喺嘴，示意：「收聲！」仲 tag埋「 family stay stronger」
8:00pm
Mandy向洗米仔解釋，叫佢唔好太敏感，又指其留言是針對早前有人借用佢名開 fb，賣加大碼孕婦衫，並說：「 I'm not the one changing things in your life」，又表示可以跟柏豪直接對話。
8:30pm
洗米仔態度軟化，指自己只係想搞清事件，同埋唔想傷害佢愛錫嘅人，又叫 Mandy留低聯絡方法，同埋 send埋佢講嘅 fb「 XXL」截圖俾佢笑吓。
8:40pm
Mandy再回覆洗米仔，叫佢問佢公司攞聯絡方法，方便單對單對話。
8:45pm
洗米仔回覆祝福 Mandy過得快樂，並叫她要宣揚同情心，好過宣揚仇恨，關心一下尼泊爾地震事件。又叫佢盡量減低對佢屋企嘅影響，尤其係佢細妹，唔想屋企人受傷害， Mandy冇耐回覆贊成柏豪說話，又話多謝佢嘅祝福，柏豪隨即仲 follow埋 Mandy ig做「朋友」，暫時停戰。
2/5
1:00am 隔一陣 Mandy又再上載自拍照，指泳衣照的留言只係針對假 fb事件，仲多謝支持佢嘅人，至於討厭佢嘅，佢都冇辦法，因為人人都有權有自己想法。
醫生意見
孕婦開刀剖腹，一般都會比預產期提早。但早前美國有醫學研究指出，太早剖腹生產會影響嬰兒腦部發展，導致智力、身體活動甚至協調能力也較低。根據家庭醫生關嘉美表示：「孕婦正常情況下足 36週就可以開刀，但係因人而異，有問題嗰陣醫生可能會早啲開，有時過咗預產期，如果 BB都未出嚟又可能會催生幫佢開肚，有啲可能係擇日，實在有太多原因會提早開刀，呢啲都係由佢婦產科醫生決定，不過如果足 36週，一般都冇乜問題，但最好唔好早過 32週。」
|
鍾意就快D Share啦！
|
|
|