雖然古天樂肯揼水開戲，但張家輝就冇呵住老闆新寵郭采潔，浴缸自殺，浸水浸足兩粒鐘，話之！
娛樂偵訊
張家輝糟躓 古天樂新女
做導演做上癮的張家輝，繼去年的處男作《盂蘭神功》後，再得古天樂話事的電影公司開水喉，自導自演新作《陀地驅魔人》，不過今次的女主角就由心悠 BB，變成古老闆的緋聞女友郭采潔。雖然對住哎吔事頭婆，但張家輝完全冇手軟！浸水俾梯夾俾人「嚟真」摑到喊，仲有同場加料意外拗柴變豬蹄，乜仇都報晒嘅郭采潔亦忍唔住吐苦水：
「好似拍咗部動作片咁！」張家輝，因住俾人秋後算賬呀！
開工水滴滴
八年未試過留長頭髮的郭采潔，在《陀地驅魔人》扮女鬼，要戴假髮上陣外，加上係隻水鬼，所以開工大部分時間都係水滴滴濕晒身。
「初時見到鏡入面嘅我，都要諗一諗先記得呢個係自己。經常濕住身埋位都幾辛苦，還好有髮型師幫手，頭髮其實係 wet look，唔算係真濕，所以無咁易會覺得凍。」郭采潔說。
因為是在浴缸自殺，所以郭采潔是水鬼，拍自殺一幕，她浸水超過兩小時，張導才收貨。
吊威吔拗柴
為了營造女鬼會飄的感覺，張家輝同工作人員預備了大量法寶，包括人肉轉盤，郭采潔不費吹灰之力就可以轉身外，她還要整個人被木摺梯夾住，再由工作人員抬起營造懸浮半空的效果，被木梯套住，郭采潔唔可以去廁所，等埋位時亦要兩個工作人員扶住，無法隨便走動。
其中有場吊威吔戲，點知威吔突然鬆脫，郭采潔落地唔穩拗柴，腳踭即時腫到豬蹄咁，但她只是稍為敷冰減痛，休息一陣頂硬上繼續開工。「覺得好似拍咗部動作片一樣。」郭采潔說。
摑到喊
同影帝張家輝有不少對手戲，但郭采潔說點都不及被江美儀摑的一幕難忘。
導演張家輝講到明，要有口水、眼淚、鼻涕、化妝甩晒的效果，場戲只可以一 take過！擔心郭采潔交唔足戲，張家輝決定「幫手」，私下叫江美儀落重手。
「啪！」一聲，大聲到張家輝都覺得肉痛，馬上嗌 good take，又撲上前慰問，只見郭采潔雙眼一泡眼淚，黑絲江美儀有幾出力，可想
而知。
撰文、攝影、攝錄：娛樂組
|
鍾意就快D Share啦！
|
|
|
