洪天明示範跳自創天鵝湖，大仁即跟住跳。
娛樂偵訊
六呎洪天明 跳天鵝湖氹仔
老婆周家蔚三年抱兩，大仔洪大仁 13年出世，今年四月再剖腹誕下細仔洪竟琋，有兩個「移動城堡」要供，大細路洪天明亦要修心養性，努力搵錢。近年大部分時間在內地開工的他，早前做湊仔公帶大仁去學芭蕾舞，為鼓勵兩歲仔上堂，六呎洪天明不惜氹氹轉扮跳天鵝湖，好搞笑！
學跳舞放電
做咗兩任老豆的洪天明，已經唔再係新手！老婆周家蔚湊住六個月大細 B，他自己一個帶住大仔洪大仁，到九龍塘上興趣班學跳舞。入課室前，大仁黐住老豆唔肯放，洪天明要又錫又攬又抱，勁氹！
老豆講極都唔聽，大仁攬實唔放，洪天明惟有出招，在眾目睽睽下，自己氹氹轉大跳天鵝湖，六呎男人為氹兩歲仔，幾騎呢都得。
「平時天明唔喺香港，就由 Janet（周家蔚）帶 TJ（大仁）去興趣班，小朋友精力無窮，啲媽咪要安排多幾個活動幫佢哋放電， TJ鍾意跳舞，所以 Janet就幫佢報咗學芭蕾舞爵士舞，又學嘢又可以放電，文女（文頌嫻）個女都有去學，平時送咗啲細路去上堂，佢哋會約埋飲茶等放學。文女個女大 TJ半年，每次 TJ上堂唔聽老師話，就會報告俾 Janet知，好鬼馬！」知情者說。
驚細仔唔認得
兩個仔，一個兩歲幾一個六個月，單是照顧兩子，已熬盡周家蔚全副心機。
「其實自從細仔出世，天明都成熟咗，知道唔可以好似以前咁，佢嚟緊會返內地拍戲三個月，佢都話驚個細仔唔認得自己，所以盡量安排兩至三個星期，就返香港一次，一來可以見吓兩個仔，咁做對兩公婆亦好，以俾老婆一啲 support，係一種責任感，所以天明真係識諗咗。」洪天明身邊人透露。
成擔心機
娛圈男人事業心重，遲婚遲生，三尾四頭甚至望五才做老豆，湊細路，俾嘅時間同心機，倍計！
劉德華
五張才啤到一個女的劉華，連錢都唔要，推戲推 job，整整休息一年湊女，直至近年才復工。
張家輝
婚後努力造人多年，但老婆關詠荷經過多次流產，幾經艱難才生到獨生女張童；張家輝視女兒如珠如寶，即使近年密密有戲拍，但只要一有時間，就會陪九歲囡張童去街接放學，更不下一次被影到孭住囡囡招搖過市，父女感情好親。
撰文、攝影、攝錄：娛樂組
|
鍾意就快D Share啦！
|
|
|
