熱爆娛樂: BIGBANG最後一爆 [壹週刊

2015年10月29日星期四

BIGBANG最後一爆 [壹週刊 - 1338] BIGBANG,M1,

韓國組合 BIGBANG喺澳門舉行一連三場演唱會，一共超過三萬名觀眾入場，成為首隊喺澳門開三場騷嘅外國組合。除咗澳門 fans，當然唔少得香港同內地嘅 fans！

外太空

BIGBANG最後一爆

韓國天團 BIGBANG今年全力出擊，由四月開始展開世界巡迴《 MADE Tour》，經過半年，終於巡到最後一站——澳門！首次喺澳門舉行演唱會，更連開三場，五位成員喺台上施展渾身解數，臨別秋波梗係要出盡全力報答歌迷，唱到失聲都要繼續唱呀！

行程緊密捱到殘

BIGBANG今年舉行世界巡迴《 MADE Tour》，四月喺韓國首爾開始，之後由五月開始一連五個月推出新單曲，工作排到密密麻麻，更加因為行程太緊密，而要將原定十月推出嘅大碟《 MADE》押後。暑假期間，密集式喺中國內地走勻十幾個城市，再加幾站東南亞，十月巡到去美加同墨西哥，直踩去埋澳洲，尾站嚟到澳門，差唔多成個月無休息。澳門頭場直情係水準大跌，五位成員疲態盡現，隊長 G-Dragon水腫走晒樣，大成更加患上重感冒，被迫取消 solo表演部分，尾段同歌迷打招呼時更加完全出唔到聲，搞到 Fans好心痛！幸好之後兩晚休息番夠本，重拾狀態，加上係世界巡迴最後一場，成員都表現得特別 high， MC時 T.O.P、大成同勝利更加即興跳舞，呢種特別福利唔係場場有得睇，今次真係好彩喇！世界巡迴之後，佢哋會展開日本巡迴，直到下年二月，預計尾場喺首爾舉行，成個巡迴就正式完結。之後成員就逐個入伍，要再見到佢哋齊人演出，起碼要七年之後喇！

G-Dragon上個月被指同日模水原希子分手，之後一直寄情於演唱會，不過最近似乎發福不少，唔通失戀暴飲暴食？

大成第一場失聲， fans非常擔心，不過佢應承 fans會盡快好番，第二場開始回復水準，返到韓國真係要好好休息。

BIGBANG同唱片公司續約，不過年紀最大嘅 T.O.P將會喺下年入伍，到 2022年先再次合體！

中英雙語溝通顯誠意

有人問：「 BIGBANG成日嚟開演唱會，唱咁多場一模一樣，都唔明點解場場都要睇？」雖然係同一個巡迴，不過 BIGBANG上次 6月喺香港開嘅演唱會，同今次澳門已經有好多出入，因為中間推出多首新歌，於是演唱會嘅表演曲目有好大變動，除咗大熱歌曲《 BANG BANG BANG》、《 LOSER》之外，最新推出嘅《 SOBER》、《 We like 2 party》喺香港無唱過， fans聽到新歌都特別興奮。除咗曲目編排之外，另一新鮮感係歌衫。 BIGBANG巡迴多個地方，就算係同一首歌，都準備好幾套歌衫，今次澳門演唱會，幾乎有一半以上嘅歌衫係同香港場唔一樣， fans當係一個全新嘅演唱會去睇！嚟到世界巡迴最後一站，五位成員對海外 fans嘅招呼愈來愈周到，全程用英文同普通話發言，勝利指自己用咗三個月學普通話，講到完整句子兼同 fans對答，太陽更加學咗一段《月亮代表我的心》，全場聽完拍爛手掌，非常有誠意呀！