米曹當日被捧為麥記女神，但原來佢極抗拒，要求喺麥當勞門前影相都不願意。她說：「覺得同我𠵱家做緊嘅嘢好唔同，所以唔想！」最後張相只係離遠見到 M記招牌，距離愈來愈遠！
爆 Like王
麥記女神反網絡 23條 本土 90後米曹：政黨信唔過
13年 YouTube短片《一生只想尋找一個肯挨麥記的女人》爆紅，片中當時只得 19歲的女主角米曹（ Micho)被捧為麥記女神。做女神 facebook自然多兵，人氣又夠，換着第二個一定食住個勢做明星，做埋新城嫂先係王道。
偏偏 21歲米曹最唔想，就連接受訪問亦抗拒喺麥記門口影相。 facebook貼文亦唔係教人扮靚，而係講政治，最近仲自製網絡 23條懶人包，又吹雞叫人圍立法會， 90後女神好有主見。
F：《 FACE》米：米曹
F：當時被稱為麥記女神有咩感覺？
米：抗拒囉，女神有個固定形象係點樣，黑長頭髮好斯文，唔講粗口，我完全唔係一個咁樣嘅人，嗰段片我真係做戲㗎，演技嚟㗎。
F：點解學人玩政治？
米：其實麥記條片之前已經開始接觸政治，以前曾經係學民思潮嘅義工，嗰陣大家冇為意，但其實自己熱衷於呢方面。我諗我哋呢個年紀，認識政治比較多，但係咪去到我咁 hardcore，大部分都唔係，而最令我覺得要真係行出嚟，就係反國教嗰陣接觸到呢樣嘢，好明白如果唔再出嚟抗爭，就會俾個政府得逞。
F：點解會拍網絡 23條懶人包？
米：我其實都唔係好明，社會對呢件事嘅關注度會咁低。對我自己嚟講，網絡 23條係比真普選通唔通過更加重要，雖然有好多人都有拍，去講呢樣嘢，但嗰啲人通常都係好社運嘅重心人物，我接觸到嘅圈子同佢哋唔同，咁做到咪做囉，想更加多人關注。
F：點解唔入政黨呢？
米：佢哋信唔過㗎，例如民主黨，大家初頭以為民主黨真係民主㗎喎，做咗幾廿年話自己爭取民主，但原來會行入中聯辦同人握手，聽中聯辦去投票，我哋好難對佢哋有信心。（長毛咁激進，咁接近你哋都唔鍾意呢？）最近長毛（梁國雄）搶人咪，我對於佢當日有句說話好反感，佢話你哋憑咩嘢問我，喂，你係民選議員，市民質詢你，係天經地義，佢嗰種態度，我覺得好不恥！其實長毛唔接近我哋，佢係左派，即係大愛包容呀；我係本土派，覺得香港人利益應該行先。有啲年青人好似我咁，唔想受任何政治組織底下制肘。
F：妳好憎強國人？
米：我自己喺外國讀書，都認識一啲中國人藝術水平好高，我唔會一竹篙打沉一船人，但有好多係冇咗中國文化，我反感嘅係嗰啲人。
F：分黨分派，怕唔怕一盤散沙？
米：社運界越嚟越散，我唔知好定唔好，立場唔同，要討論爭辯係遲早嘅事，𠵱家冇咩大議題，就嘈咗佢先囉，搞清楚大家嘅立場。一盤散沙我唔覺得，因為唔同立場係有組織，有中心喺度。
F：妳點睇黃家強？
米：黃家強第一佢嘅觸覺唔夠敏感，佢作為一個公眾人物要處理得比較小心，而 Beyond最早時期佢哋嘅立場明顯喺泛民嗰邊，而黃家強走咗去建制派嘅一個晚會，同一個民望咁低嘅特首合唱，大家感覺就係俾你出賣咗。如果要揾食做呢啲，背脊骨落 Beyond係一個咩類型樂隊，佢應唔應該出席喺嗰度呢？仲有一班話向抗日老兵致敬嘅藝人，但其實抗日唔關共產黨事，喺香港打日本仔嘅唔係共產黨，係英兵同啹喀兵，連常識都冇，對嗰件事基本認知都冇，點解要表態呢？我覺得根本係利益問題。
13年仲喺倫敦名校 St. Martin讀緊珠寶設計嘅米曹幫朋友拍咗《一生只想尋找一個肯挨麥記的女人》，原來米曹當時已熱衷於香港政治，只不過冇人留意啫！而米曹現職 MyRadio客席主持，出過小說《女生情事宣言》，嚟緊仲會出 3本書，全職做作家。
攝影：鄭明川
|
鍾意就快D Share啦！
|
|
|