大陸傳媒言之鑿鑿話張敬軒因為撐佔領，所以被飛出《我是歌手4》，又有報道指係因為大媽陳淨心舉報有功乜乜乜。黃秋生一早都講咗，totally ignore佢就得：而且陳大媽之前話檢舉盧凱彤撐佔領，但盧凱彤已表明冇收過封殺通知，大陸嘅job亦繼續傾緊。陳大媽似是多此一「舉」。
至於話軒仔被退出《我是歌手4》，但軒仔同經理人Mani霍汶希都表示:冇參加，又何來退出？
今日Mani回覆《蘋果》查詢時已回應咗:「公司冇人落實過軒仔參加《我是歌手4》，所以唔存在退出問題。」問到湖南衛視有否邀請軒仔參加《我是歌手4》？Mani表示：「有探討過，但公司冇落實過軒仔參加，佢哋亦冇公佈過有軒仔。」晚上軒仔到金鐘PP出席由佢同王菀之配音電影《小王子》3D首映上，口徑一樣。
軒仔話，今日見到自己被退出嘅報道，都覺得好愕然，佢話:「我嘅期表係去到一月份，就係做澳門演唱會同頒獎禮，其他工作安排呢，Mani都話係冇嘅。其實好多大陸真人騷都有搵我，但就冇聽過呢回事(《我是歌手4》)囉。」
講到陳大媽，佢真係犀利喇，學秋生話齋，上綱上線一味靠屈，完全不講邏輯，但佢咁樣講一講，又大把人附和。依家佢咁樣高舉軒仔，玻璃心水兵又出動。軒仔話:「每個人都有權發表睇法同意見，但係我自己就得一個睇法，就係啲歌迷千祈唔好騷擾到人哋。網絡暴力係唔啱嘅。」
班大陸網民係咁喺微博FF，叫軒仔滾出大陸又話封殺又盛。零創意。軒仔對此謂:「其實要講嘅呢，去年已經講晒(去年都有傳過軒仔被玻璃國封殺)喇，而且今次呢件事都唔係事實，我都唔知道點回應。依家內地嘅工作仲係繼續，冇受過今次事情影響。」
講到秋生力撐佢，軒仔話:「吓係咩？佢幾時講0架？不過社會係包容唔同意見同睇法，大家嘅出發點只係得一個，就係想呢個社會穩定，人人有工開，大家都開開心心，越少紛爭越好啦。」
至於阿梅遺物再度被拍賣，軒仔之前亦曾出價，望保住阿梅遺物，今晚軒仔就表示:「今次件事交晒俾志偉哥統籌，我都覺得自己上一次好似有少少好事多磨，好似有少少推高咗個價。不過大家心態都係一樣嘅，今次就交俾前輩處理。我哋應該幫梅姐保留光輝同成果。」
| 攝影:沈健程 |  |  |
 |  |  |
 |  |  麥子樂﹑張敬軒及陳家樂出席《小王子》3D首映。 |
 麥子樂 |
|
鍾意就快D Share啦！
|
|
|