全知言
冇晒惡搞好苦悶！經典二次創作有排數
WhatsApp傳 cap圖，分享惡搞歌已是日常指定動作。咁好玩嘅二次創作世界，梗係想佢直到永遠啦，但如果網絡 23條（版權（修訂）條例草案）一旦通過，第時傳張圖都隨時踎監……
二次創作唔係網民專利，連班成日被惡搞嘅藝人都話正，但有權利就有義務，想繼續玩，就先請抗爭，你都唔想 send cap圖畀人，要俾晒版權稅過三關先 send啫？
關楚耀：希特拉最正
我最鍾意嘅二次創作，就係《希特拉 cut唔到有綫》，首先飾演希特拉嗰位演員非常之勁啦，加埋咁有深度、創作力嘅網民，要跟番住個口形配音，然後成個故事改晒，真係好勁!我有機會真係想揾佢哋寫一寫歌詞先得。我唔記得自己有冇被改圖啦，但就算有，我都唔會嬲，因為呢啲係創作嚟。
陸詩韻：典解嘅？
我最鍾意、最記得就係吳若希「典解嘅？好打意呀！」我自己有時同朋友食飯，用嚟開下玩笑。我自己都有被惡搞過，大約 7、 8年前，我有個幫騎馬機宣傳嘅片，咁我喺騎馬機上嘅動作，就被網民攞嚟做 gif，我覺得係攪笑嘅冇咩所謂，我好贊成網上創作。
馬天佑： JFung無限 loop
我好鍾意睇 JFung嘅二次創作，佢嗰啲無限 loop，電子音樂做背景嘅片，我好鍾意睇，成日一邊做嘢，一邊播住聽。 cap圖就一定係吳若希嗰張「典解嘅？」，好得呀，我係一個好開放嘅人，如果有人惡搞我，我絕對唔會嬲，唔會追究。
翁子光(《踏血尋梅》導演）：有請小鳳姐
我最 like當然係小鳳姐嘅〈喜氣洋洋〉啦，呢首歌成日用嚟抽水，一啲政權呀，社會上不公嘅事，最近郭富城目標咁大，亦有網民攞《踏血尋梅》佢嘅劇照改圖都有。我自己冇咩所謂，唔太大傷害嘅就 ok，二次創作就係反映市民對主流嘅意見、評價， Andy Warhol都有二次創作啦，呢樣嘢唔應該被剝削。
街坊撐二次創作： WhatsApp覆人就係用 cap圖
唔使問都知後生仔勁 like二次創作啦，佢哋基本上日日聽改詞，對話用 cap圖代替，想繼續？都係嗰句，要爭取囉！唔好俾網絡 23條通過呀！
即時報料 facepop
熱線： 9222 0828
電郵：facenews@nextmedia.com
facebook： Face Magazine inbox
line、 we chat id： facemagazine
|
鍾意就快D Share啦！
|
|
|