阿佘只肯畀兩個月期拍《千王之王》，搞到四哥冇咗每日 10小時休息時間，馬國明 42歲壯年，捱夜梗係掂啦，四哥 79歲喎，真係戥佢擔心。《蘋果日報》圖片
真面目
辛苦晒 開條件限 2個月拍完 佘詩曼累 79歲謝賢直踩搏老命
大台下個月翻拍 36年前劇集《千王之王》，主角係 79歲謝賢同佘詩曼搭件馬國明。眾所周知，大台拍劇開工時間收賣人命，謝老四雖然把口話唔使人遷就，但據知劇組都自動調教將就吓。
可惜阿佘因為要趕拍大陸劇同電影，令原訂要拍 4個月嘅 30集劇，限定要兩個月內完工。劇組惟有度期 Cher到爆，最慘係 79歲四哥隨時要候命 48小時，四哥會唔會爆到喺現場逐個兜巴星㗎？
個個話唔睇嘅《賭城風雲 3》結果收 9億幾人仔，證明炒冷飯賭片係有市場嘅，一心照顧祖國嘅大台，當然想食住賭片風，刺激下低迷嘅收視啦，所以下月就會翻拍 36年前的《千王之王》，今次更揾嚟當年主角，即係 79歲謝賢出山。
日瞓 3粒鐘
自汪阿姐開先例，自訂老人家條例，長者可以不計來回車程有 10小時休息，雖然話呢種優惠唔係個個有，不過以謝老四呢啲級數當然有優待。
雖然四哥講過唔使人就，不過劇組點忍心叫個 80歲老人家日捱夜捱，可惜同劇女主角佘詩曼，因為年中要拍大陸劇同電影，搞到只可以俾兩個月時間《千》劇拍攝，而阿佘同謝賢又有超多對手戲，搞到四哥想唞下都唔得，將會日日下午四點開廠景，第朝再開朝 7外景，每日得 3個鐘瞓。聽講四哥都知今次亡命式開工，都拍心口話唔驚喎，不過佢老人家對上嗰次拍劇係 06年亞視嘅《情陷夜中環 2》，今次唔係去旅行咁輕鬆喎！
鐵人都死
大台工廠式拍劇係人都知，前無綫主席梁乃鵬 13年曾經揚言，演員每日都有 8小時休息，結果有冇呢？唔知，不過最近返大台拍劇嘅 52歲方中信，喺《律政強人》煞科宴上就話：「未來 10年都唔會返去拍劇，每日瞓得幾個鐘。」冇吹水㗎！
採訪、撰文：娛樂組
來源 source: http://hk.face.nextmedia.com
|
鍾意就快D Share啦！
|
|
|
