近年積極操 fit嘅山聰，早前試過由九龍屋企專登揸車過山頂跑步，貪嗰邊空氣清新啲嘛！
封面
分手 3年 何超雲開閘 陳山聰洗底部署翻撻
拍拖 2年， 13年 4月與何超雲正式分手的陳山聰近年積極減肥，戒蒲戒暴食，又搏命跑步兼健身， 2年內拍足 8套大台劇，近日在訪問中說：「工作行先，希望上天賜個女仔俾我，陪我到老。」十足上進青年。
據知新年期間超雲親自聯絡山聰好友郭政鴻，借口與契女見面，實情打探舊愛山聰消息。山聰積極洗底，超雲亦 dry足 3年，復合有望喎！
近日於大台熱播的《潮流教主》，稱得上潮人嘅，應只有自備私伙服裝的 39歲陳山聰。反觀與何超雲拍拖時期的陳山聰，身形又肥又腫，難得分手 3年，山聰肯的起心肝減肥，潮味出番嚟。
戒蒲喪運動
「我未試過工作得咁辛苦，有一晚拍完《刀》（《刀下留人》）嘅打戲，轉妝去拍《殭》，卸妝再拍《刀》，嗰段日子，攰到一坐低就瞓着，但我樂在其中，都唔知當時嘅意志力喺邊度嚟。𠵱家嘅我簡單得多，每一次同家人、朋友嘅聚會都好珍惜，無諗過要做俾邊個睇，只知道要面對自己，活在當下。」
以前和超雲拍拖期間，山聰陪住女友四圍飛歎世界，分手後的山聰脫胎換骨，近年每日都必定抽時間做大量帶氧運動，無論跑步、打拳甚至舞獅，而且戒掉夜蒲習慣，少煙少酒，腹肌、胸肌亦同時返晒嚟。
「山聰自從同超雲分開之後就好似怕咗接近女色咁，出得去食飯行街嘅都清一色係男人，行得埋佢身邊嘅女性，一係就同事，一係就親戚，有時都忍唔住笑佢係咪轉咗性取向！」山聰好友透露。
超雲開綠燈
分手 3年，據知超雲和山聰最初都沒有聯絡，但超雲近月開始向友人問起山聰近況，「超雲近排問過二至三次山聰近況，言語間都有問山聰搵到女朋友拍拖未，不過問問吓又無咗下文，我哋有問佢使唔使做中間人約出嚟大家見番面，佢又話唔使！」
超雲口是心非，其實身體最誠實。農曆年期間，超雲主動搵山聰好友郭政鴻拜年，又話好掛住郭政鴻兩個女，「自從佢兩個分手後，超雲都好少搵山聰嘅朋友，係近幾個月至搵番，我哋都估佢對山聰態度唔同咗。」其實超雲已經 dry足 3年，雖然不時在微博更新近況，但大多都係與家人合照，擺明未有新男友。
想生個女
14年山聰回歸大台拍劇，一口氣拍完 8套，連休息都幾乎無機會。「我有鬥心去改、去搏，但呢個鬥心已經唔係年輕時嘅鬥心。以前只想快啲上位做一線、做視帝，𠵱家，咩都經歷過後，覺得所有嘢都係虛無，最實在嘅係開心。」
近日幫大台宣傳《潮流教主》時，山聰對愛情睇法亦漏口風說：「隨緣唔會去強求，但希望再拍拖，對方只係一個平凡嘅圈外人就可以。以前唔想生小朋友，因為賺到錢要去買衫，𠵱家想法變咗，想生個女。有啲嘢係無得後悔，惟有做好𠵱家嘅嘢，希望大家會慢慢接受番我囉！」
準備好咪去馬囉！唔通要超雲做主動咩？
回帶總是最好的！
當你曾經唔怕大台永不錄用話唔撈就唔撈，𠵱家要日捱夜捱拍膠劇；當你曾經着上身唔係最貴就係 fashion騷 VIP，𠵱家要扮識潮流係鐵嘅陳豪小跟班；當你曾經年中一半時間都喺歐洲仲要坐頭等，𠵱家渡假只可以似小市民去下幾日日本……點解陳山聰要翻兜？唔使問點解喇啩？
採訪、撰文：娛樂組
|
鍾意就快D Share啦！
|
|
|
